Hindistondagi mehmonxonada sodir bo'lgan yong'inda 9 nafar xorijlik halok bo'ldi
Hodisa yuzasidan mehmonxona egasiga qarshi jinoyat ishi qo‘zg‘atilgan.
Hindistonning Kalkutta shahrida joylashgan mehmonxonada yong‘in sodir bo‘lib, kamida 9 kishi halok bo‘ldi, 6 kishi jarohatlandi. Bu haqda The Hindu nashri xabar berdi.
Ma’lumotlarga ko‘ra, yong‘in 19-avgust kuni kechasi Shikhali mehmonxonasida yuz bergan.
Politsiya ma’lumotiga ko‘ra, halok bo‘lganlarning barchasi Bangladesh fuqarolari bo‘lib, ular Hindistonga mahalliy tibbiyot muassasalarida davolanish uchun kelgan.
Yong‘in oqibatida yana 6 kishi jarohatlangan va ular shifoxonaga yotqizilgan. Ularning fuqaroligi hozircha aniqlanmagan. Mehmonxonadagi yana 15 nafar fuqaro xavfsiz evakuatsiya qilingan.
Mahalliy rasmiylar binoda qidiruv va tekshiruv ishlari davom etayotgani sababli qurbonlar soni oshishi mumkinligini bildirgan.
Hodisa yuzasidan mehmonxona egasiga nisbatan jinoyat ishi qo‘zg‘atilgan. Yong‘inning kelib chiqish sabablari va xavfsizlik talablariga rioya qilingan-qilinmagani o‘rganilmoqda.
The Hindu nashrining qayd etishicha, ushbu voqea Kalkuttada mehmonxonalarda yong‘in xavfsizligi choralariga rioya etilishi masalasini yana kun tartibiga olib chiqdi. Bundan ikki kun avval Tarapitdagi mehmonxonada sodir bo‘lgan yong‘inda ham 9 kishi halok bo‘lgan edi.
