Jizzaxda MIB orqali bir oila yarashtirildi
Shu tariqa aliment ishi yarashuv bilan yakunlangan.
Majburiy ijro byurosining Sharof Rashidov tuman bo‘limi ish yurituvida bo‘lgan aliment undirish to‘g‘risidagi ijro ishi oilaviy kelishuv va yarashuv bilan ijobiy yakuniga yetkazildi.
Ijro ishi doirasida davlat ijrochisi tomonidan taraflarga aliment majburiyatining mazmun-mohiyati, farzand taʼminotida ota-onaning masʼuliyati hamda qonunchilikda belgilangan talablar yuzasidan tushuntirishlar berildi.
Sud jarayonida olib borilgan yarashuv tadbirlari natijasida taraflar o‘zaro kelishib, nizoli masalani tinch yo‘l bilan hal etishga qaror qildi. Eng muhimi, oiladagi munosabatlarni tiklash va farzand manfaatlarini taʼminlashga qaratilgan kelishuvga erishildi.
Mazkur holat aliment masalasida nafaqat majburiy undiruv, balki taraflarni yarashtirish, oilaviy munosabatlarni tiklash va farzandlarning huquq va manfaatlarini himoya qilish ham muhim ahamiyat kasb etishini yana bir bor ko‘rsatdi.
