O‘zbekiston oliygohlarida Qirg‘iziston, Qozog‘iston, Tojikiston va Mo‘g‘uliston fuqarolariga 70 ta grant ajratildi

 

2026/2027 o‘quv yilida O‘zbekiston davlat oliy ta’lim tashkilotlarida Qozog‘iston, Qirg‘iziston, Tojikiston va Mo‘g‘uliston fuqarolari uchun jami 70 ta grant o‘rni ajratildi. Bu haqda Oliy ta’lim, fan va innovatsiyalar vazirligi ma’lum qildi.

 

Shundan Qirg‘iziston, Qozog‘iston va Tojikiston fuqarolariga 20 tadan, Mo‘g‘uliston fuqarolariga esa 10 ta grant ajratilgan.

 

Qirg‘iziston fuqarolari uchun 20 ta grant 6 ta bakalavriat yo‘nalishi bo‘yicha beriladi. Ular orasida maktabgacha ta’lim, kompyuter injiniringi, agronomiya, qurilish muhandisligi, suv xo‘jaligi va melioratsiya hamda ekologiya va atrof-muhit muhofazasi yo‘nalishlari bor.

 

Qozog‘iston fuqarolari uchun ajratilgan 20 ta grant matematika, iqtisodiyot, tarix, buxgalteriya hisobi, kompyuter injiniringi, telekommunikatsiya texnologiyalari, logistika va boshqa yo‘nalishlarni qamrab oladi.

 

Tojikiston fuqarolari uchun grantlar davolash ishi, stomatologiya, logistika, transport vositalari muhandisligi, xalqaro munosabatlar, yurispudensiya, kiberxavfsizlik, sun’iy intellekt va boshqa ta’lim yo‘nalishlari bo‘yicha taqsimlangan.

 

Mo‘g‘uliston fuqarolari uchun esa 10 ta grant, jumladan 4 ta bakalavriat va 6 ta magistratura o‘rni ajratilgan. Grantlar konchilik, veterinariya, qishloq xo‘jaligi, chorvachilik, transport-logistika va xalqaro savdo kabi yo‘nalishlarni qamrab oladi.