Raqobat qo‘mitasi maktab bozorlarida narxlarni asossiz oshirmaslikka chaqirdi
Qo'mita savdo nuqtalarida o'quv qurollarini hamyonbop narxlarda xarid qilish uchun zarur sharoitlarni ta'minlash muhimligini bildirdi.
Yangi o‘quv yiliga tayyorgarlik doirasida O‘zbekiston bo‘ylab umumta’lim maktablari, dehqon bozorlari va savdo komplekslarida mavsumiy “Maktab bozorlari” tashkil etilgan.
Raqobat qo‘mitasi ushbu savdo nuqtalarida o‘quv qurollari, maktab formasi, darsliklar va boshqa anjomlarni sifatli hamda hamyonbop narxlarda xarid qilish uchun zarur sharoitlarni ta’minlash muhimligini ta’kidladi.
Qo‘mita tadbirkorlarga sotilayotgan mahsulotlarning sifati, narxlarining asosliligi va iste’molchilarga zarur ma’lumotlarning taqdim etilishi bo‘yicha qonunchilik talablariga rioya qilishni eslatdi. Shuningdek, maktab bozorlari ishtirokchilarini narxlarni asossiz oshirmaslikka chaqirdi.
Fuqarolarga esa xarid vaqtida mahsulotning sifati, ishlab chiqaruvchisi, narxi va boshqa muhim ma’lumotlariga e’tibor qaratish tavsiya etildi.
Qo‘mita maktab bozorlarida narxlar barqarorligini ta’minlash bo‘yicha monitoring olib borishini ma’lum qildi.
Narxlarning asossiz oshirilishi yoki boshqa qonunbuzarlik holatlariga duch kelgan fuqarolar 1159 qisqa raqamiga murojaat qilishlari mumkin.
