Rossiya ukrainaliklarning o‘z hukumatini tanlash huquqini belgilamasligi kerak — Fedorov

 

Ukrainaning sobiq mudofaa vaziri Mixaylo Fedorov mamlakatda urush davom etayotganiga qaramay, prezidentlik saylovlarini o‘tkazish imkonini beradigan qonuniy va xavfsiz mexanizm ishlab chiqishga chaqirdi. U bu haqda 19-avgust kuni e’lon qilgan videomurojaatida ma’lum qilgan.

 

Fedorovning ta’kidlashicha, Ukraina urush yana bir necha yil davom etgan taqdirda ham fuqarolarning o‘z hukumatini saylash huquqini ta’minlash yo‘lini topishi kerak.

 

“Putinga ukrainaliklar qachon o‘z hukumatini tanlashi mumkinligini hal qilishiga yo‘l qo‘ymasligimiz kerak”, — degan Fedorov.

 

U saylovlarni urush sharoitida tashkil etish oson bo‘lmasligini tan olgan. Xususan, frontdagi harbiylar, chet elda yashayotgan millionlab ukrainaliklar hamda jangovar harakatlar davom etayotgan hududlarda yashovchi fuqarolarning ovoz berish huquqini ta’minlash zarurligini qayd etgan. Biroq uning fikricha, bu muammolar saylovlarni o‘tkazishni imkonsiz qilmaydi.

 

Fedorov demokratiya faqat tinchlik davrida amal qiladigan tamoyil emasligini ta’kidlab, Ukraina aynan demokratik va erkin davlat bo‘lib qolish uchun kurashayotganini bildirgan.

 

Uning ushbu bayonoti Vladimir Zelenskiy Yevgeniy Xmara nomzodini Mudofaa vaziri lavozimiga ilgari surganidan bir necha soat o‘tib yangragan. Bu esa Fedorovning hukumatga qaytish ehtimolini kamaytirgan.

 

Ma’lumotlarga ko‘ra, Fedorov 2026-yil yanvaridan Mudofaa vaziri lavozimida ishlagan. Iyul oyida u lavozimidan ozod etilgan. Shundan so‘ng Zelenskiy unga boshqa yuqori davlat lavozimlarini taklif qilgani, biroq Fedorov Mudofaa vazirligiga qaytish imkoniyati bo‘lmasa, ularni rad etgani aytilmoqda.

 

Fedorovning iste’fosi ortidan Ukrainada uning qayta lavozimga tayinlanishini talab qilgan norozilik namoyishlari ham bo‘lib o‘tgan.