Rossiyalik biznesmenlar Ukrainaga qarshi urush uchun qariyb 4,5 milliard dollar ajratdi

 

Rossiyalik yirik biznes vakillari tomonidan mamlakat federal budjetiga o‘tkazilgan mablag‘lar 2026-yil avgust o‘rtalariga kelib 383,69 milliard rublga, ya’ni 4,5 milliard dollardan ortiq summaga yetgan. Bu haqda Deutsche Welle Rossiyaning “Elektron budjet” tizimi ma’lumotlariga tayanib xabar berdi.

 

Qayd etilishicha, 2026-yilning dastlabki yetti yarim oyida budjetga tushgan ushbu mablag‘lar 2025-yil davomida qayd etilgan 251,3 milliard rubllik tushumdan 1,5 baravar ko‘p.

 

Ma’lumotlarga ko‘ra, mablag‘lar Rossiya prezidenti Vladimir Putin yirik biznes vakillarini mamlakat budjetiga “ixtiyoriy badallar” kiritishga chaqirganidan keyin sezilarli darajada oshgan.

 

Putin mart oyida Rossiya biznes vakillari bilan yopiq uchrashuv o‘tkazgan. The Bell nashri manbalariga ko‘ra, ushbu uchrashuvda tadbirkorlarga budjetni qo‘llab-quvvatlash taklif qilingan. Ushbu tashabbusning kelib chiqishida “Rosneft” rahbari Igor Sechin turgani aytiladi.

 

Ikki manbaga ko‘ra, tadbirkor Sulaymon Kerimov uchrashuvning o‘zida budjetga 100 milliard rubl o‘tkazishga va’da bergan. Yana kamida bir nafar biznes vakili aniq summa ko‘rsatmagan holda tashabbusni qo‘llab-quvvatlagan.

 

Statistikaga ko‘ra, mart oyidagi uchrashuvgacha nodavlat tashkilotlardan federal budjetga atigi 15,6 milliard rubl tushgan. Aprel oyida esa tushum keskin oshib, 159,7 milliard rublga yetgan. May oyida bu ko‘rsatkich 232,3 milliard, iyunda 294,4 milliard rubl bo‘lgan. Iyul va avgust oyining birinchi yarmida esa mablag‘lar yana qariyb 30 foizga oshib, 383,69 milliard rublni tashkil etgan.

 

Shu tariqa, 2026-yilda Rossiya budjetiga yirik biznes va nodavlat tashkilotlardan kelib tushgan “ixtiyoriy badallar” hajmi o‘tgan yilgi ko‘rsatkichdan sezilarli darajada oshgan.