Toshkent aeroportida kannabis moyini olib o‘tmoqchi bo‘lgan shaxs ushlandi
Yana bir holatda Toshkent tumanida harakatlanayotgan “Damas”dan 12 992 dona “Sibutramin” moddasi bo‘lgan kofe mahsuloti aniqlangan.
Davlat xavfsizlik xizmati va Bojxona organlari xodimlari hamkorligida o‘tkazilgan tezkor tadbirlarda tarkibida psixofaol hamda kuchli ta’sir qiluvchi moddalar bo‘lgan mahsulotlarning noqonuniy olib kirilishi va muomalaga kiritilishining oldi olindi. Bu haqda DXX xabar berdi.
Toshkent xalqaro aeroportida “Bangkok – Toshkent” yo‘nalishida uchib kelgan fuqaroning yuklari rentgen apparati orqali tekshirilganda, shubhali oziq-ovqat mahsulotlari aniqlangan.
Tekshiruv davomida Toshkent viloyati O‘rtachirchiq tumanida yashovchi, 2002-yilda tug‘ilgan, muqaddam sudlangan shaxs turli oziq-ovqat mahsulotlari niqobi ostida 978 gramm kannabis moyi hamda tarkibida psixofaol modda bo‘lgan, umumiy og‘irligi taxminan 500 grammni tashkil etuvchi qo‘ziqorinlarni kelgusida sotish maqsadida olib kelgani aniqlangan.
Yana bir holatda Toshkent tumani hududida harakatlanayotgan “Damas” rusumli avtomashina to‘xtatilib, xolislar ishtirokida ko‘zdan kechirilgan.
Natijada avtomashinada yo‘lovchi sifatida ketayotgan Farg‘ona viloyatining Oltiariq va Uchko‘prik tumanlarida yashovchi, 1987 va 1989-yillarda tug‘ilgan ikki nafar shaxsga tegishli polietilen paketlarda tarkibida “Sibutramin” kuchli ta’sir qiluvchi moddasi bo‘lgan 12 992 dona kofe mahsuloti borligi aniqlanib, belgilangan tartibda rasmiylashtirib olingan.
Aniqlanishicha, mazkur mahsulotlar qo‘shni respublikadan olib kelingan bo‘lib, ularni Farg‘ona viloyatida sotish rejalashtirilgan.
Har ikki holat yuzasidan qonunbuzarlarga nisbatan jinoyat ishlari qo‘zg‘atilib, ayni paytda tergov harakatlari olib borilmoqda.
