Toshkentda kredit qarzi sabab mashina xatlandi
Maʼlum bo‘lishicha, fuqaroning bankdan 10 mln qarzi bo‘lgan.
Fuqarolik ishlari bo‘yicha Mirobod tumanlararo sudining 2025 yil 9 dekabrdagi ijro hujjatiga asosan, qarzdor O.I.dan undiruvchi bank foydasiga 10 million 13 ming so‘m miqdoridagi qarzdorlikni undirish belgilangan.
Mazkur ijro hujjati Majburiy ijro byurosining Toshkent shahar boshqarmasi ish yurituviga kelib tushgach, uning ijrosini taʼminlash maqsadida qonunchilikda belgilangan tartibda zarur ijro harakatlari amalga oshirildi.
Ijro harakatlari davomida qarzdor O.I.ga tegishli bo‘lgan “HONGQI” rusumli avtotransport vositasi aniqlanib, belgilangan tartibda xatlandi.
Ushbu chora qarzdorlikni undirish, sud hujjatining ijrosini taʼminlash hamda undiruvchining qonuniy talablarini qanoatlantirish maqsadida amalga oshirildi.
Taʼkidlash joizki, sud hujjatlarining o‘z vaqtida va to‘liq ijro etilishi fuqarolar hamda yuridik shaxslarning qonuniy huquq va manfaatlarini taʼminlashning muhim kafolatlaridan biri hisoblanadi. Shu bois qarzdorlarning ijro hujjatlarida belgilangan majburiyatlarni ixtiyoriy ravishda bajarishi eng maqbul yechimdir.
Qarzdorlik ixtiyoriy ravishda bartaraf etilmagan taqdirda, qonunchilikda nazarda tutilgan majburiy ijro choralari qo‘llanilishi mumkin.
