Doimiy yashash joyiga ega bo‘lmagan shaxslar uchun vaqtincha boshpana bilan ta’minlash tartibi belgilandi
Yashash joyiga ega bo‘lmagan shaxslar uchun vaqtincha boshpana, tibbiy yordam, hujjatlarni tiklash va ishga joylashishga ko‘maklashishni nazarda tutuvchi yagona tartib joriy etildi.
O‘zbekistonda muayyan yashash joyiga ega bo‘lmagan shaxslarni vaqtincha boshpana va zarur ijtimoiy xizmatlar bilan ta’minlashning yagona tartibi belgilandi. Tegishli tartib Vazirlar Mahkamasining 18-avgustdagi qarori bilan tasdiqlangan ma’muriy reglamentda nazarda tutilgan.
Unga ko‘ra, bunday shaxslar Vaqtincha boshpana va ijtimoiy moslashuv markazlariga joylashtiriladi. Markazlarga fuqarolarning o‘zi murojaat qilishi, shuningdek, mahalla, ichki ishlar organlari yoki boshqa vakolatli tashkilotlar tomonidan aniqlangan shaxslar haqida ma’lumot taqdim etilishi mumkin.
Markazlarda shaxslarga vaqtincha boshpana va zarur maishiy sharoitlar yaratiladi. Shuningdek, ular tibbiy ko‘rikdan o‘tkaziladi, zarurat bo‘lganda davolanishga yo‘naltiriladi hamda pensiya, nafaqa va boshqa ijtimoiy to‘lovlarni rasmiylashtirishda ko‘mak ko‘rsatiladi.
Bundan tashqari, pasport yoki ID-karta kabi hujjatlarni tiklash, qarindoshlarini aniqlash, ishga joylashish va ayrim hollarda uy-joy masalasini hal etishga ko‘maklashish ham nazarda tutilgan.
Shaxs markazga joylashtirilgach, uning ma’lumotlari tegishli axborot tizimlariga kiritiladi. Ijtimoiy xizmatlar markazi xodimlari tomonidan uning holati o‘rganilib, zarur yordam choralarini belgilovchi individual ijtimoiy moslashuv rejasi ishlab chiqiladi.
Qarorga muvofiq, shaxs dastlab markazga 20 kungacha muddatga joylashtirilishi mumkin. Zarurat bo‘lganda, uning markazda qolish muddati qonunchilikda belgilangan tartibda uzaytiriladi.
Shuningdek, ijtimoiy moslashtirish jarayonini monitoring qilish, amalga oshirilgan ishlar bo‘yicha ma’lumotlarni shakllantirish hamda mas’ul xodimlarning javobgarligini belgilash mexanizmlari joriy etiladi.
Mazkur tartib muayyan yashash joyiga ega bo‘lmagan shaxslarni aniqlashdan boshlab, ularni vaqtincha boshpana bilan ta’minlash, zarur tibbiy va ijtimoiy xizmatlar ko‘rsatish hamda mustaqil hayotga qaytishiga ko‘maklashish jarayonlarini yagona tizim asosida tashkil etishga qaratilgan.
