Markaziy Afrikada oltin konining qulashi oqibatida 100 dan ortiq kishi halok bo'ldi
Ko‘plab konchilar bedarak yo‘qolgan yoki vayronalar ostida qolgan.
Markaziy Afrika Respublikasining g‘arbiy qismida, Kamerun bilan chegaradosh hududda joylashgan hunarmandchilik oltin konining qulashi oqibatida 100 dan ortiq kishi halok bo‘ldi.
Mahalliy OAV xabarlariga ko‘ra, fojia 19-avgust kuni mahalliy vaqt bilan soat 14:00 atrofida Babua shahridan qariyb 50 kilometr uzoqlikdagi Zamboye qishlog‘ida sodir bo‘lgan.
Qutqaruv ishlari davomida 100 dan ortiq jasad topilgan. Mahalliy OAVlarning ayrimlari halok bo‘lganlar soni 107 nafarga yetgani haqida xabar bergan.
Mahalliy rasmiylar va qutqaruvchilarning ma’lumotlariga ko‘ra, ko‘plab konchilar hamon bedarak yo‘qolgan yoki vayronalar ostida qolgan. Shu sababli qurbonlar soni yanada ortishi mumkin.
Dastlabki ma’lumotlarga ko‘ra, hodisa konchilar ishlayotgan bir nechta yerosti tunnellarining qulab tushishi natijasida yuz bergan bo‘lishi mumkin. Voqea sabablarini aniqlash uchun tergov boshlangan.
Qutqaruv va qidiruv ishlari davom etmoqda. Mahalliy rasmiylar tashkilotlar hamda ko‘ngillilardan qutqaruv ishlarida yordam so‘ragan.
Markaziy Afrika Respublikasida hunarmandchilik oltin konlarida bunday baxtsiz hodisalar tez-tez uchraydi. Minglab odamlar kichik miqyosdagi konchilik ishlarida, ko‘pincha davlat nazoratisiz faoliyat yuritadi.
