OTMga kirishda 234 mingga yaqin abituriyent minimal ballni to‘play olmadi
Bu jami abituriyentlarning 37,54 foizini tashkil etadi.
2026/2027-o‘quv yili uchun davlat oliy ta’lim tashkilotlari bakalavriatiga hujjat topshirgan 677,9 ming nafar abituriyentning 233 935 nafari kirish uchun belgilangan minimal ball — 56,7 ballni to‘play olmagan.
Bu jami abituriyentlarning 37,54 foizini tashkil etadi. Bu haqda Oliy ta’lim vazirining birinchi o‘rinbosari Sardor Rajabov ma’lum qildi.
Oliy ta’limga kirish uchun minimal talab etiladigan ko‘rsatkich maksimal ballning 30 foiziga teng. 56,7 balldan past natija qayd etgan abituriyentlar ulushi so‘nggi yillarda kamayib bormoqda:
-
2023/2024-o‘quv yili — 46 foiz;
-
2024/2025-o‘quv yili — 43 foiz;
-
2025/2026-o‘quv yili — 41 foiz;
-
2026/2027-o‘quv yili — 37,54 foiz.
Sardor Rajabovning ta’kidlashicha, mazkur ko‘rsatkichning pasayishi abituriyentlarning bilim darajasi va test natijalari yaxshilanayotganidan dalolat beradi.
Shu bilan birga, so‘nggi yillarda davlat OTMlari bakalavriatiga hujjat topshirayotganlar soni ham kamaygan.
2026-yilda davlat OTMlari bakalavriatiga 677,9 ming nafar abituriyent onlayn ro‘yxatdan o‘tgan. Avvalgi yillarda esa bu ko‘rsatkich bir milliondan ortiq bo‘lgan:
-
2019-yil — 1 066 925 nafar;
-
2020-yil — 1 484 085 nafar;
-
2021-yil — 948 211 nafar;
-
2022-yil — 1 214 232 nafar;
-
2023-yil — 1 018 007 nafar;
-
2024-yil — 894 279 nafar;
-
2025-yil — 732 411 nafar;
-
2026-yil — 677 900 nafarga yaqin.
Shunday qilib, 2026-yilda OTMga hujjat topshirganlar soni 2023-yilga nisbatan qariyb 340 ming nafarga yoki 33 foizga kamaygan.
Abituriyentlar sonining qisqarishiga sirtdan ta’lim shakliga qabulning to‘xtatilishi ham ta’sir qilgan bo‘lishi mumkin.
