Portugaliyada “burqa qonuni” kuchga kirdi
Mamlakatda jamoat joylarida yuzni yopib yurish taqiqlandi.
Portugaliya prezidenti Antonio Jose Seguro jamoat joylarida yuzni yashirishga qaratilgan kiyimlarni taqiqlovchi qonunni imzoladi. Bu haqda European Pravda nashri Euractiv ma’lumotlariga tayanib xabar berdi.
Mahalliy OAV tomonidan “burqa qonuni” deb atalgan hujjat iyul oyida parlament tomonidan o‘ng qanot hukmron koalitsiyasi va o‘ta o‘ng qanot vakillarining qo‘llab-quvvatlashi bilan ma’qullangan. Chap qanot partiyalari esa qonunga qarshi ovoz bergan.
Qonunga ko‘ra, jamoat joylarida yuzni yashirish yoki shaxsni aniqlashga to‘sqinlik qiluvchi kiyimlardan foydalanish taqiqlanadi. Shuningdek, shaxsni jinsi, dini, yoshi yoki kelib chiqishiga bog‘liq sabablarga ko‘ra yuzini yopishga majburlash ham taqiqlangan.
Prezident Seguro yuz insonning shaxsiyati va muloqotining muhim qismi ekanini ta’kidlagan. Shu bilan birga, u mazkur masala ijtimoiy va madaniy jihatdan nozik ekanini qayd etgan.
Qoidani buzganlar 150 yevrodan 3 ming yevrogacha jarimaga tortilishi mumkin.
Qonunda ayrim istisnolar ham nazarda tutilgan. Jumladan, tibbiy, kasbiy, badiiy yoki ob-havo bilan bog‘liq zaruratlar, shuningdek, diniy ibodat joylari, diplomatik vakolatxonalar va samolyot bortidagi holatlar bundan mustasno.
