Qozog‘istonda xavfli isitma: kasallanganlar orasida o‘zbekistonliklar ham bor
Turkiston viloyatida kanalar chaqishi oqibatida xavfli isitma qayd etilmoqda.
Qozog‘istonning Turkiston viloyatida yil boshidan buyon Qrim-Kongo gemorragik isitmasining 8 ta holati qayd etildi. Kasallanganlar orasida qovun dalalarida ishlash yoki dam olish vaqtida kana chaqqan O‘zbekiston fuqarolari ham bor.
Bu haqda Turkiston viloyati Sanitariya-epidemiologik nazorat boshqarmasi rahbari Nurbek Nishanov “Otyrar” nashriga bergan intervyusida ma’lum qilgan.
Mutaxassisning so‘zlariga ko‘ra, qayd etilgan 8 ta holatning 6 tasi chorva mollariga qarash yoki ular bilan aloqada bo‘lish, yana bir holat esa hovlida o‘t o‘rish vaqtida kana chaqishi bilan bog‘liq.
Yil boshidan buyon hududda 35 mingdan ortiq namuna tekshirilgan va 55 ta kanada Qrim-Kongo gemorragik isitmasi qo‘zg‘atuvchisi aniqlangan.
Turkiston viloyati mazkur infeksiya bo‘yicha endemik hudud hisoblanadi. Kasallik, odatda, bahor va yoz oylarida kanalar faolligi oshishi bilan ko‘proq uchraydi.
Mutaxassislar chorva mollari bilan ishlashda yoki tabiat qo‘ynida bo‘lganda himoya kiyimlaridan foydalanish, tanani muntazam ravishda kana bor-yo‘qligiga tekshirish va kana chaqqan holatda tibbiy yordamga murojaat qilishni tavsiya etmoqda.
