Rossiyada o'zbekistonlik haydovchi 5 yilga qamaldi
18 yoshli taksi haydovchisi yo‘lovchini beysbol tayoqchasi bilan urib, og‘ir tan jarohati yetkazgan.
Rossiyaning Vladivostok shahrida yo‘lovchini beysbol tayoqchasi bilan urib, unga og‘ir tan jarohati yetkazgan O‘zbekiston fuqarosiga sud hukmi o‘qildi. Bu haqda “Glavnye Novosti” xabar berdi.
Ma’lum qilinishicha, voqea 2025-yil noyabr oyida sodir bo‘lgan. 18 yoshli O‘zbekiston fuqarosi taksi haydovchisi bo‘lib ishlagan. U yo‘lovchi bilan janjallashib qolganidan so‘ng avtomobil yukxonasidan beysbol tayoqchasini olib, erkakning bosh qismiga kamida uch marta zarba bergan.
Oqibatda jabrlanuvchi og‘ir tan jarohatlari, jumladan, ochiq bosh miya jarohatini olgan va shifoxonaga yotqizilgan.
Hodisadan keyin haydovchi Primorye o‘lkasidan qochib ketgan. Huquqni muhofaza qiluvchi organlar uni Kemerovo viloyatida qo‘lga olib, Vladivostokka qaytargan.
Sud O‘zbekiston fuqarosini qasddan og‘ir tan jarohati yetkazishda aybdor deb topib, umumiy tartibli koloniyada 5 yil muddatga ozodlikdan mahrum qilish jazosini tayinlagan.
Shuningdek, sudlanuvchi jabrlanuvchiga yetkazilgan ma’naviy zarar uchun 1 million rubl miqdorida tovon puli to‘lashi belgilangan.
