Toshkent va Farg‘onada “Umra”ga yuborishni va’da qilganlar ushlandi
Tegishli litsenziyasi bo‘lmagan shaxs 3 kishini “Umra”ga yuborish evaziga 3 450 dollar, yana bir shaxs 4 kishini yuborish uchun 4 200 dollar talab qilgan.
Toshkent shahri va Farg‘ona shahrida fuqarolarni “Umra” ziyoratiga yuborish bilan bog‘liq noqonuniy holatlar aniqlandi. Bu haqda DXX ma’lum qildi.
Toshkent shahrida yashovchi, 1981-yilda tug‘ilgan fuqaro tegishli litsenziyaga ega bo‘lmagan holda, o‘zini “Umra” ziyoratini tashkil etishga ruxsat berilgan turistik firmaning vakili sifatida tanishtirib, 3 nafar fuqaroni Saudiya Arabistoniga “Umra” safariga yuborish hamda ziyorat amallarini to‘liq bajarishlarini ta’minlash evaziga 3 450 AQSH dollari talab qilgan.
Davlat xavfsizlik xizmati, Iqtisodiy jinoyatlarga qarshi kurashish departamenti va Ichki ishlar organlari xodimlari hamkorligida o‘tkazilgan tezkor tadbirda mazkur shaxs 3 400 AQSH dollari va 600 ming so‘mni olayotgan vaqtida ashyoviy dalillar bilan ushlangan.
Farg‘ona shahrida aniqlangan boshqa holatda esa 1998-yilda tug‘ilgan fuqaro tanishlari orqali 4 nafar fuqaroni “Umra” ziyoratiga yuborishni va’da qilib, buning evaziga jami 4 200 AQSH dollari talab qilgan. So‘ralgan pul mablag‘larini olayotgan vaqtida uning noqonuniy faoliyatiga DXX va IIB xodimlari tomonidan chek qo‘yilgan.
Mazkur holatlar yuzasidan har ikki shaxsga nisbatan jinoyat ishlari qo‘zg‘atilib, ayni paytda tergov harakatlari olib borilmoqda.
