Toshkentda “Yashil to‘lqin”ning yangi qismi ishga tushirildi

 

Toshkent shahridagi Amir Temur maydoni va unga tutash ko‘chalarda transport harakatini muvofiqlashtirishga qaratilgan “Yashil to‘lqin” svetofor tizimining yangi qismi ishga tushirildi.

 

Markaziy yo‘l harakatini boshqarish markazi ma’lumotiga ko‘ra, hududdagi 5 ta svetofor yagona algoritm asosida sinxronlashtirilgan. Tizim ikki yo‘nalish bo‘yicha harakatni muvofiqlashtirib, transport vositalarining ortiqcha to‘xtashlarini kamaytirishga xizmat qiladi.

 

Endilikda haydovchi belgilangan tezlik rejimiga rioya qilgan holda yashil chiroqda harakatni boshlasa, Amir Temur maydonidagi aylanma yo‘l bo‘ylab keyingi svetoforlarga yashil signal vaqtida yetib borishi mumkin.

 

Tizim, xususan, Amir Temur va Buxoro ko‘chalari kesishmasidan Amir Temur ko‘chasi bo‘ylab Oloy bozori yo‘nalishida, shuningdek, teskari yo‘nalishda harakatlanishni muvofiqlashtiradi.

 

“Yashil to‘lqin”ning ishlash prinsipi svetoforlarning barchasi bir vaqtda yashil chiroq yoqishiga emas, balki transport vositasining belgilangan masofani bosib o‘tish vaqtini hisobga olgan holda svetofor signallarini ketma-ket muvofiqlashtirishga asoslangan.

 

Tizimdan samarali foydalanish uchun haydovchilarga:

• harakatni yashil signalda boshlash;

• belgilangan tezlikni saqlash;

• keskin tezlashish va tormozlashdan saqlanish;

• xavfsiz masofani saqlash;

• svetofor signallariga qat’iy rioya qilish tavsiya etiladi.

 

“Yashil to‘lqin” tezlikni oshirish uchun emas, balki transport oqimini bir maromda va xavfsiz tashkil etish uchun joriy etilgan.

 

Yangi tizim natijasida svetoforlar oldidagi ortiqcha to‘xtashlar, tirbandlik va kutish vaqtini kamaytirish, transport harakatini silliqlashtirish, shuningdek, yoqilg‘i sarfi va zararli chiqindilarni qisqartirish kutilmoqda.

 

Ayni paytda Amir Temur aylanma yo‘li va Mahtumquli ko‘chasi o‘rtasidagi yo‘nalishni “Yashil to‘lqin” tizimiga ulash algoritmi ishlab chiqilmoqda.