AQSh Eronga qarshi “tarixdagi eng qattiq sanksiyalar”ni joriy etishini ma’lum qildi
Sanksiyalar tafsilotlari kelasi hafta e’lon qilinadi.
AQSh Moliya vaziri Skott Bessent Qo‘shma Shtatlar Eronga qarshi «tarixdagi eng qattiq sanksiyalar»ni joriy etishini ma’lum qildi. Bu haqda Reuters xabar berdi.
Bessentning aytishicha, yangi choralar Eronga nisbatan keng ko‘lamli harbiy operatsiyalarga ehtiyojni kamaytirishga qaratilgan. Vazir sanksiyalarning tafsilotlari kelasi hafta e’lon qilinishini bildirgan.
Uning ta’kidlashicha, AQSh Eronga nisbatan iqtisodiy bosimni kuchaytirish bilan birga blokadani ham qo‘llamoqda. Bessent ittifoqchilar va boshqa davlatlarni ham bu borada qaror qabul qilishga chaqirgan.
AQSh Moliya vaziridan Xitoyning Eron bilan biznes aloqalari sabab Pekinga qarshi choralar ko‘rilishi mumkinligi haqida so‘ralgan. Bessent bu masaladagi ko‘plab muzokaralarni shaxsiy tartibda olib borish ma’qul ekanini aytgan.
Bessentning bayonoti AQSh prezidenti Donald Tramp Eronni izolyatsiya qilishga qaratilgan keng ko‘lamli iqtisodiy operatsiya boshlanganini ma’lum qilganidan keyin yangragan.
