Dori, sigaret, telefon va qurilish buyumlari: qalbaki hujjatlar asosidagi yuk ushlandi

 

Davlat xavfsizlik xizmati va Bojxona qo‘mitasi xodimlari hamkorligida o‘tkazilgan tezkor-qidiruv tadbiri davomida mamlakat hududiga qalbaki bojxona hujjatlari asosida noqonuniy olib kirilgan tovar-moddiy boyliklar aniqlandi. Bu haqda DXX xabar berdi.

 

Tadbir davomida Buxoro viloyati G‘ijduvon tumanida yashovchi, 2001-yilda tug‘ilgan fuqaro boshqaruvidagi yuk avtotransport vositasi Toshkent shahri Chilonzor tumanidagi bojxona omborida xolislar ishtirokida ko‘zdan kechirilgan.

 

Tekshiruv natijasida tranzit deklaratsiyasi va yo‘l kuzatuv hujjatlarida ko‘rsatilmagan 2 490 dona tibbiy buyum, 13 794 quti dori vositasi, 880 dona biologik faol qo‘shimcha, 273 370 quti sigaret va tamaki mahsuloti, 3 131 dona elektron sigareta, 8 591 dona uyali telefon, 19 dona planshet, 52 dona parfyumeriya mahsuloti borligi aniqlangan.

 

Shuningdek, hujjatlarda ko‘rsatilgan miqdori va boshqa xususiyatlari amaldagi holatiga mos kelmagan 72 501 dona qurilish asbob-uskunasi ham aniqlangan.

 

Dastlabki ma’lumotlarga ko‘ra, avtotransport vositasi egasi Toshkent shahrida yashovchi 1978 va 1995-yillarda tug‘ilgan ikki nafar fuqaro bilan til biriktirib, mazkur tovarlarni qalbaki bojxona hujjatlari asosida qo‘shni davlatdan O‘zbekistonga olib kirgan.

 

Holat yuzasidan mazkur shaxslarga nisbatan Jinoyat kodeksining 182-moddasi 2-qismi “a” bandi bilan jinoyat ishi qo‘zg‘atilgan. Hozirda tergov harakatlari olib borilmoqda.