O'zbekistonda podyezdlarga konditsioner o‘rnatish taqiqlanadi
Yangi qoidalar 2026-yil 16-noyabrdan kuchga kiradi.
O‘zbekistonda ko‘p qavatli uylarni saqlash va ulardan foydalanish qoidalariga yangi o‘zgartirishlar kiritildi. Tegishli hujjat Adliya vazirligi tomonidan davlat ro‘yxatidan o‘tkazilgan.
Yangi talablarga ko‘ra, ko‘p qavatli uylarning kirish joylariga isitish va sovutish uskunalarini, jumladan, konditsionerlarni o‘rnatishga yo‘l qo‘yilmaydi.
Shuningdek, ko‘p qavatli uylar fasadlaridagi nuqsonlarni bartaraf etish muddatlari belgilandi. Jumladan, yoriqlar, qoplama va suvoqning shikastlanishi, namlik izlari hamda boshqa nuqsonlar bir oy ichida bartaraf etilishi kerak.
Podvallardagi asosiy isitish tarmoqlarida nosozlik aniqlangan taqdirda, bu haqda issiqlik ta’minoti tashkilotiga xabar berilishi va mutaxassislarning ta’mirlash ishlarini amalga oshirishi uchun ularga kirish imkoniyati yaratilishi lozim.
Liftlardan foydalanish bo‘yicha ham yangi talablar joriy etiladi. Lift kabinalarida uning yuk ko‘tarish qobiliyati, yo‘lovchilarning ruxsat etilgan soni, “Xavfsiz lift” elektron tizimidagi ro‘yxatdan o‘tgan raqami, davriy texnik ko‘riklar to‘g‘risidagi ma’lumotlar hamda xizmat ko‘rsatuvchi yoki avariya xizmati tashkilotining telefon raqami ko‘rsatilishi kerak.
Bundan tashqari, lift shaxtalari, mashina xonalari va kirish joylari toza hamda yoritilgan holatda saqlanishi belgilangan.
Yangi qoidalar 2026-yil 16-noyabrdan kuchga kiradi.
