Peruda 7,2 magnitudali zilzila sodir bo‘ldi
Hozircha jabrlanganlar haqida ma’lumot berilmagan.
Peruning Ayakucho mintaqasida 7,2 magnitudali zilzila qayd etildi. Peru Milliy seysmologiya markazi ma’lumotiga ko‘ra, zilzila mahalliy vaqt bilan soat 13:00 da sodir bo‘lgan. Epitsentr Korakora shahridan 35 kilometr shimolda, 108 kilometr chuqurlikda joylashgan.
Germaniya Geologiya fanlari tadqiqot markazi zilzila magnitudasini 6,6, Yevropa-O‘rta yer dengizi seysmologiya markazi va AQSh Geologik xizmati esa 6,7 deb baholagan. Peru Geofizika instituti esa magnitudani 7,2 deb qayd etgan.
Zilzila mamlakatning bir qator hududlarida, jumladan, Lima shahrida ham sezilgan. Korakorada evakuatsiya vaqtida ikki kishi jarohatlangan. Dastlabki ma’lumotlarga ko‘ra, 22 ta uy, 6 ta tibbiyot muassasasi va 1 ta maktab zarar ko‘rgan. Shuningdek, hududda tosh qulashi kuzatilgan. Hozircha jabrlanganlar haqida aniq ma’lumot berilmagan.
Zilziladan so‘ng sunami xavfi e’lon qilinmagan.
Eslatib o‘tamiz, avvalroq Indoneziyada 7,7 magnitudali zilzila sodir bo‘lgan edi.
