Qirg‘izistonda Telegram boshqa xorijiy servislar bloklanishi mumkin

 

Qirg‘iziston Davlat soliq xizmati mamlakat rezidentlariga elektron xizmatlar ko‘rsatuvchi, biroq majburiy soliq ro‘yxatidan o‘tmagan xorijiy kompaniyalarga nisbatan cheklovlar qo‘llanishi mumkinligini ma’lum qildi.

 

Soliq xizmatiga ko‘ra, Qirg‘iziston rezidentlariga elektron xizmatlar ko‘rsatuvchi xorijiy tashkilotlar soliq organida majburiy ro‘yxatdan o‘tishi va tegishli soliq majburiyatlarini bajarishi kerak.

 

Elektron xizmatlar qatoriga dasturiy ta’minot, onlayn o‘yinlar, internet-reklama, xosting, ma’lumotlarni saqlash, raqamli kontentdan foydalanish imkonini berish va boshqa shu kabi xizmatlar kiradi.

 

Hozirga qadar 73 ta xorijiy kompaniya soliq ro‘yxatidan o‘tgan. Shu bilan birga, Qirg‘iziston rezidentlaridan katta miqdorda daromad olayotgan, biroq majburiy ro‘yxatdan o‘tmagan xorijiy kompaniyalar ham aniqlangan.

 

Davlat soliq xizmati tijorat banklari bilan hamkorlikda pul o‘tkazmalari bo‘yicha ma’lumotlarni tahlil qilib, katta moliyaviy aylanmaga ega 11 ta xorijiy kompaniyani aniqlagan. Ular orasida Alibaba Group Holding Limited (1688), Pinduoduo, Twitch, Microsoft, Valve, Sony Interactive Entertainment, Epic Games, Electronic Arts, VK, Telegram va Dropbox bor.

 

2024–2025-yillar davomida ushbu kompaniyalarga Qirg‘iziston rezidentlaridan 15,9 millionga yaqin pul o‘tkazmasi amalga oshirilgan. Ularning umumiy qiymati 13,2 milliard so‘mdan oshgan.

 

Eng katta pul oqimi Shanghai Xunmeng Information Technology Co., Ltd. (Pinduoduo) — 8,89 milliard so‘m, Alibaba Group Holding Limited (1688) — 2,83 milliard so‘m va Microsoft — 1,01 milliard so‘m hissasiga to‘g‘ri kelgan.

 

Davlat soliq xizmati mazkur kompaniyalarga soliq ro‘yxatidan o‘tish va soliq majburiyatlarini bajarish tartibini tushuntiruvchi rasmiy xatlar yuborgan. Shuningdek, tegishli murojaatlar diplomatik kanallar orqali Qirg‘iziston Tashqi ishlar vazirligi orqali ham yuborilgan.

 

Biroq soliq xizmatining ma’lumotlariga ko‘ra, hozirgacha kompaniyalardan javob olinmagan va ular soliq organlarida ro‘yxatdan o‘tmasdan faoliyatini davom ettirmoqda.

 

Soliq majburiyatlarini bajarmaslik davom etsa, vakolatli organlarga mazkur kompaniyalarning Qirg‘iziston hududidagi elektron xizmatlariga kirishni cheklash bo‘yicha so‘rov yuborilishi mumkin.