Saida Mirziyoyeva Buxorodagi loyihalar ijrosi bilan tanishdi
Tashrif davomida suv tejash, maktabgacha ta’lim va turizm loyihalari muhokama qilindi.
Buxoro viloyatiga tashrif davomida Saida Mirziyoyeva may oyida belgilangan rejalar ijrosi va amalga oshirilgan ishlar natijalarini ko‘zdan kechirdi.
Tashrif davomida “Jo‘yzar” kanalining 9 kilometrlik qismi betonlashtirilgani qayd etildi. Yana 10 kilometrlik qismida ushbu ishlar davom etmoqda. Kanalni betonlashtirish natijasida yiliga 12 million kub metr suvni tejash imkoniyati yaratiladi. Shu hududda baliqchilik xo‘jaligi ham ishga tushirilgan.
Shuningdek, “Shayxoncha” mahallasida 240 o‘rinli zamonaviy maktabgacha ta’lim tashkiloti barpo etilgani bilan tanishildi.
Saida Mirziyoyeva tashrif davomida turizm sohasidagi yangi loyihalarni ham ko‘zdan kechirdi. Jumladan, “Afshona” majmuasi, etno-uylar, “Jo‘yi Muliyon” kanalini tiklash, yangi aeroport yaqinidagi mehmonxonalar va turizm klasteri bilan bog‘liq masalalar muhokama qilindi.
Buxoroga yiliga 10 million sayyohni jalb etish, viloyatni tranzit hududdan zamonaviy va to‘laqonli turizm maskaniga aylantirish asosiy maqsadlardan biri ekani ta’kidlandi.
Tashrif yakunida Saida Mirziyoyeva Buxoroning “Yetti pir” qadamjolarini ziyorat qildi.
