Nurafshonda Yoshlar ishlari bo‘limi rahbari so'kingani uchun ishdan bo'shatildi
Ijtimoiy tarmoqlarda Nurafshon shahar Yoshlar ishlari bo‘limi rahbarining mahalla yoshlar yetakchilariga qo‘pol va haqoratomuz munosabatini aks ettiruvchi audioyozuv tarqalgan edi.
Nurafshon shahar Yoshlar ishlari bo‘limi rahbari Mirkarim Mirmahmudovichning mahalla yoshlar yetakchilariga nisbatan qo‘pol va haqoratomuz munosabatda bo‘lgani aks etgan audioyozuv ijtimoiy tarmoqlarda tarqalib, muhokamalarga sabab bo‘ldi.
Mazkur holat yuzasidan Yoshlar ishlari agentligi Toshkent viloyati boshqarmasi va Nurafshon shahar hokimligi tomonidan xizmat tekshiruvi o‘tkazildi.
O‘rganish davomida ijtimoiy tarmoqlarda tarqalgan audioyozuvdagi holatlar o‘z tasdig‘ini topgani aniqlangan. Xususan, 2026-yil 18-avgust kuni M. Mirmahmudovich mahalla yoshlar yetakchilari ishtirokidagi yig‘ilishda xizmat odobi va kasbiy etika talablarini qo‘pol ravishda buzib, ularga keskin hamda haqoratomuz munosabatda bo‘lgan.
Xizmat tekshiruvi davomida uning ish faoliyatida qator boshqa kamchiliklar ham aniqlangan.
Holat yuzasidan M. Mirmahmudovich bilan suhbat o‘tkazilib, aniqlangan kamchiliklar va ularning salbiy oqibatlari tushuntirilgan. U o‘zining qo‘pol xatti-harakatlarini tan olgan hamda o‘zi bilan tuzilgan mehnat shartnomasini bekor qilishini bildirgan.
Natijada, M. Mirmahmudovich bilan tuzilgan mehnat shartnomasi bekor qilingan. Uning ish faoliyatida aniqlangan boshqa kamchiliklar yuzasidan tekshiruvlar davom ettirilmoqda va natijalariga ko‘ra tegishli choralar ko‘rilishi ta’minlanadi.
