Toshkentda dizayn-kodni joriy etish yondashuvi qayta ko‘rib chiqildi
Bunga tadbirkorlarning tanqidiy fikr-mulohazalari sabab bo‘lgan.
Toshkent shahar hokimligi poytaxtda dizayn-kodni joriy etish jarayoniga bildirilgan fikr-mulohazalar, jumladan, tadbirkorlarning tanqidiy takliflari asosida yondashuv qayta ko‘rib chiqilganini ma’lum qildi.
Hokimlikning qayd etishicha, bundan buyon asosiy e’tibor ochiq muloqot, talablarni tushunarli tarzda yetkazish va tadbirkorlar bilan yuzaga kelayotgan masalalarni individual tartibda ko‘rib chiqishga qaratiladi.
Joriy yilning 11-mayidan 26-iyuliga qadar dizayn-kodni joriy etish ishlari Toshkent shahrining 56 ta ko‘chasidagi 3 228 ta tadbirkorlik subyektini qamrab olgan.
Jarayonning tadbirkorlarga ta’sirini o‘rganish maqsadida Toshkent shahar hokimligi Savdo-sanoat palatasining hududiy boshqarmasi bilan hamkorlikda so‘rovnoma o‘tkazgan.
So‘rovnoma natijalariga ko‘ra, ayrim holatlarda dizayn-kod talablari, zarur hujjatlarni rasmiylashtirish tartibi va bajarilishi lozim bo‘lgan ishlar ketma-ketligi o‘z vaqtida hamda yetarlicha tushunarli tarzda izohlanmagani aniqlangan.
Hokimlik ushbu e’tirozlarni o‘rinli deb topgan va kelgusidagi ishlarni tashkil etishda mazkur fikr-mulohazalarni inobatga olishini bildirgan.
Ma’lumotlarga ko‘ra, hozirga qadar 509 nafar tadbirkor o‘z binosi fasadini yangilagan. Yana 2 627 nafar tadbirkorda tegishli ishlar davom etmoqda. Qolgan masalalar tuman hokimliklari va mutasaddi tashkilotlar bilan hamkorlikda individual tartibda ko‘rib chiqiladi.
Shuningdek, “Toshkent Invest Kompaniyasi” AJ, Raqobatni rivojlantirish va iste’molchilar huquqlarini himoya qilish qo‘mitasi hamda Toshkent shahar hokimligi huzuridagi Raqamli rivojlanish departamenti ekspertlari ishtirokida 18 ta reklama-ishlab chiqarish kompaniyasi mutaxassislarining malakasi oshirilgan.
Hokimlikka ko‘ra, dizayn-kodni joriy etishdan maqsad faqat fasadlarni yagona talablarga moslashtirish emas, balki bu jarayonni tadbirkorlar uchun tushunarli va adolatli tashkil etish, shu bilan birga, poytaxtning shaharsozlik qiyofasini yaxshilashdan iborat.
