Toshkentda YPX xodimidan qochgan Malibu haydovchisi ushlandi
Avtomobil davlat raqamisiz bo‘lgan, old va orqa oynalari qoraytirilgan holda harakatlangan.
Toshkent halqa avtomobil yo‘lida YPX xodimining to‘xtash talabiga bo‘ysunmagan Malibu-2 haydovchisi ushlandi.
Toshkent shahar IIBB YHXB ma’lumotiga ko‘ra, transport vositasi “Uch qahramon”dan Hasanboy tomon harakatlanayotgan vaqtida aniqlangan. Avtomobilning davlat raqam belgisi bo‘lmagan, old va orqa oynalari qoraytirilgan hamda orqa qismiga qo‘shimcha antenna o‘rnatilgan.
Haydovchiga rupor orqali to‘xtash ishorasi berilgan. Biroq u keskin burilib, to‘xtash talabiga bo‘ysunmasdan harakatini davom ettirgan.
Transport vositasi tezkor choralar natijasida ushlangan. Haydovchiga nisbatan qonunchilikda belgilangan tartibda ma’muriy bayonnoma rasmiylashtirilib, avtomobil vaqtincha saqlash uchun jarima maydoniga joylashtirilgan.
