Turkiya Netanyaxuni hibsga olish uchun xalqaro order berdi

Turkiya Netanyaxuni hibsga olish uchun xalqaro order berdi.  Qaror Isroilning G‘azoga gumanitar yordam olib ketayotgan flotiliyani to‘xtatishi yuzasidan olib borilayotgan tergov doirasida qabul qilingan. Bu haqda Turkiya Adliya vaziri Akin Gyurlek ma’lum qildi, deya xabar bermoqda Arab News.

 

Turkiya avval ham Netanyaxu va Isroilning boshqa yuqori martabali amaldorlariga nisbatan G‘azodagi urushdagi harakatlari sabab “genotsid” ayblovi bilan hibsga olish orderlarini chiqargan.

 

“G‘azoda genotsid siyosatini amalga oshirayotgan Netanyaxu hukumatini daxlsiz va javobgarlikdan ozod deb hisoblash mumkin degan qarashni qat’iyan rad etamiz”, — dedi Gyurlek.

 

Vazirning ta’kidlashicha, Turkiya G‘azoda sodir etilgan jinoyatlarning yashirilishiga yoki ularni sodir etgan shaxslarning jazosiz qolishiga yo‘l qo‘ymaydi. Anqara aybdorlarni javobgarlikka tortish uchun milliy va xalqaro huquqning barcha imkoniyatlaridan foydalanishini bildirdi.

 

Gyurlek Turkiya Falastin xalqi, mazlumlar va insoniyat vijdoni tomonida qat’iy turishda davom etishini qayd etdi. Uning so‘zlariga ko‘ra, insoniyatga qarshi jinoyat sodir etgan shaxslarni qonun oldida javobgarlikka tortish uchun barcha zarur choralar ko‘riladi.

 

Isroil tomoni esa Turkiyaning qaroriga keskin munosabat bildirdi. Netanyaxu idorasi Turkiya Prezidenti Rajab Toyyib Erdo‘g‘anni “antisemit diktator” deb atab, Isroil Anqaraning mintaqadagi vaziyatni beqarorlashtirishga qaratilgan urinishlariga qarshi qat’iy harakat qilishda davom etishini ma’lum qildi.