Turkiyada bedarak yo‘qolgan o‘zbekistonlik erkakning jasadi dengizdan topildi
Besh kishi dengizga tushganida kuchli oqimga tushib qolgan. To‘rt nafari qutqarilgan, o‘zbekistonlik erkak esa oqim tomonidan olib ketilib, bedarak yo‘qolgan.
Turkiyaning Istanbul shahri Shile tumanida dengizda bedarak yo‘qolgan 54 yoshli O‘zbekiston fuqarosining jasadi topildi. Bu haqda Hurriyet nashri xabar berdi.
Hodisa 16-avgust kuni soat 15:15 atrofida Shile shahridagi Macera Park plyajida sodir bo‘lgan. Ma’lumotlarga ko‘ra, besh kishi dengizga tushgan vaqtida kuchli oqimga tushib, cho‘kib ketish xavfi ostida qolgan.
Voqea haqida xabar berilgach, qirg‘oq qo‘riqlash xizmati, yong‘in xavfsizligi va tez tibbiy yordam guruhlari hududga yuborilgan. To‘rt kishi qutqarilgan, o'zbekistonlik erkak esa oqim tomonidan olib ketilib, bedarak yo‘qolgan.
Shundan so‘ng qirg‘oq qo‘riqlash qayiqlari, yong‘in xavfsizligi xodimlari va ko‘ngillilar ishtirokida qidiruv-qutqaruv ishlari olib borilgan. Qidiruvlar Shilening Karakiraz hududi va uning atrofida, jumladan, havodan kuzatuv orqali amalga oshirilgan.
Ikki kun davom etgan qidiruv ishlari natijasida 18-avgust kuni qirg‘oq qo‘riqlash xizmati erkakning jonsiz jasadini dengizdan topgan. Marhumning jasadi sud-tibbiyot instituti o‘likxonasiga olib ketilgan.
