Komil Allamjonov “Do‘stlik” ordeni bilan mukofotlandi
Komil Allamjonov O‘zbekiston va AQSH o‘rtasidagi siyosiy-iqtisodiy aloqalarni rivojlantirishga qo‘shgan hissasi uchun taqdirlandi.
Prezident administratsiyasi rahbarining maslahatchisi va administratsiyaning AQSHdagi vakili Komil Allamjonov “Do‘stlik” ordeni bilan mukofotlandi. Bu haqda Prezident matbuot xizmati xabar berdi.
Komil Allamjonov 2025-yil iyunidan Prezident administratsiyasi rahbarining maslahatchisi, shu yil noyabridan esa administratsiyaning AQSHdagi vakili sifatida faoliyat yuritmoqda.
Uning ushbu lavozimlardagi faoliyati davrida O‘zbekiston va AQSH o‘rtasidagi siyosiy va iqtisodiy aloqalar faollashgan. Jumladan, ikki davlat prezidentlari so‘nggi bir yil ichida to‘rt marta yuzma-yuz uchrashgan.
Shuningdek, AQSH–O‘zbekiston Ishbilarmonlik va investitsiya kengashi tashkil etilib, O‘zbekiston Prezidenti Shavkat Mirziyoyevning AQSHdagi yirik kompaniyalar vakillari bilan uchrashuvlari o‘tkazilgan.
2026-yil 1-yanvardan O‘zbekiston rezidentlarining AQSHda kompaniya tashkil etish yoki Amerika kompaniyalari aksiyalarini sotib olish uchun mablag‘ yuborishida hukumat ruxsatini olish talabi ham bekor qilingan.
Ma’lumotlarga ko‘ra, 2026-yilning birinchi choragida O‘zbekiston rezidentlari xorijiy aktivlarga 153 million dollar miqdorida to‘g‘ridan to‘g‘ri investitsiya kiritgan.
Komil Allamjonov, shuningdek, Jorj Vashington universitetining Markaziy Osiyo dasturi bo‘yicha maxsus maslahatchisi hisoblanadi.
