OTMga kira olmagan abituriyentlar uchun 6-yo‘nalish tanlash boshlandi
Abituriyentlar 28-avgustgacha 31 mingdan ortiq vakant o‘rin uchun qo‘shimcha tanlovda ishtirok etishi mumkin.
O‘zbekistonda joriy o‘quv yilida davlat oliy ta’lim muassasalariga talabalikka tavsiya etilmagan abituriyentlar uchun vakant o‘rinlarga qo‘shimcha tanlovda ishtirok etish imkoniyati yaratildi.
2026/2027-o‘quv yilida 80 ta oliy ta’lim muassasasida 31 ming 808 ta vakant o‘rin mavjud. Ushbu o‘rinlarni to‘ldirish maqsadida 22-avgustdan boshlab abituriyentlar uchun qo‘shimcha tanlov jarayoni boshlandi.
Qo‘shimcha tanlovda oliy ta’lim muassasalariga kirish imtihonlarida 56,7 ball va undan yuqori natija qayd etgan, biroq talabalikka tavsiya etilmagan abituriyentlar ishtirok etishi mumkin.
Abituriyentlar 22-avgustdan 28-avgustgacha Bilim va malakalarni baholash agentligining my.uzbmb.uz platformasi orqali ro‘yxatdan o‘tishi mumkin.
Tanlovda fanlar majmuasi va ta’lim tili mos bo‘lgan, vakant o‘rin mavjud bakalavriat ta’lim yo‘nalishlarini tanlash mumkin.
Abituriyentlar to‘plagan ballari ketma-ketligi asosida, bazaviy to‘lov-kontrakt shaklida talabalikka tavsiya etiladi.
