O‘zbekiston fuqarolariga ham taalluqli AQSH viza cheklovi bekor qilindi
Sud Tramp ma’muriyatining 75 davlat fuqarolariga immigratsion vizalar berishni to‘xtatish siyosatini noqonuniy deb topdi.
AQSH federal sudi Tramp ma’muriyatining 75 davlat fuqarolariga immigratsion vizalar berilishini vaqtincha to‘xtatish haqidagi siyosatini noqonuniy deb topdi. Mazkur cheklov O‘zbekiston fuqarolariga ham taalluqli edi.
Manxetten okrugi sudyasi Jannet Vargas Davlat departamenti tomonidan joriy etilgan siyosatni “aniq noqonuniy” deb baholab, AQSH Davlat kotibi Marko Rubio o‘z vakolatidan oshib ketgan degan xulosaga kelgan. Bu haqda Reuters xabar berdi.
Sud qaroriga ko‘ra, Davlat departamenti ayrim mamlakatlar fuqarolariga faqat ularning fuqaroligidan kelib chiqib immigratsion viza berishni to‘xtatish vakolatiga ega emas. Sudya bunday cheklov federal immigratsiya qonunchiligiga zid ekanini ta’kidlagan.
Cheklov 2026-yil yanvar oyida joriy etilgan bo‘lib, O‘zbekiston, Rossiya va yana 73 davlat fuqarolariga ta’sir qilgan. U faqat AQSHda doimiy yashash uchun beriladigan immigratsion vizalarga taalluqli bo‘lgan. Turistik va boshqa vaqtinchalik vizalar ushbu siyosat doirasiga kirmagan.
AQSH ma’muriyati cheklovni ushbu mamlakatlardan kelgan ayrim fuqarolarning AQSH davlat byudjetiga yuk bo‘lishi va ijtimoiy yordamga tayanish ehtimoli yuqoriligi bilan izohlagan edi.
