Rossiyaning “Yabloko” partiyasi parlament saylovlaridan chetlatildi

 
Rossiya Oliy sudi “Yabloko” partiyasini parlament saylovlarida qatnashish huquqidan mahrum qildi. Partiya saylovda ishtirok etish uchun ro‘yxatdan o‘tkazilganidan ko‘p o‘tmay, uning nomzodlar ro‘yxatiga qarshi da’vo kiritilgan va sud bu talabni qanoatlantirgan.

 
Partiyani saylovdan chiqarish uchun rasmiy asos sifatida mualliflik huquqi bilan bog‘liq da’volar hamda xorijdan mablag‘ olingani haqidagi e’tirozlar ko‘rsatilgan. “Yabloko” vakillari esa bu sabablarni rad etib, partiyani saylov jarayonidan chiqarish qarori uning Ukrainadagi urushga nisbatan pozitsiyasi bilan bog‘liq ekanini ta’kidlagan.

 
Partiya urushni to‘xtatish va tinchlik muzokaralarini boshlash tarafdori ekanini muntazam bildirib keladi. Shu sababli uning parlament saylovlaridagi ishtiroki urushga qarshi kayfiyatdagi saylovchilar uchun siyosiy tanlovlardan biri sifatida ko‘rilgan.

 
Partiya rahbari Nikolay Ribakovning ta’kidlashicha, “Yabloko”ning saylovdagi asosiy maqsadi parlamentda ko‘pchilikni qo‘lga kiritish emas, balki Ukrainadagi urushni imkon qadar tezroq tugatish masalasini siyosiy kun tartibida saqlab qolish bo‘lgan.

 
Partiyaning saylovdan chetlatilishi arafasida unga bo‘lgan qiziqish ham oshgan. “Yabloko”ning ijtimoiy tarmoqlardagi auditoriyasi sezilarli ravishda kengaygan, partiya nomi internet qidiruvlarida ham avvalgidan ko‘proq uchray boshlagan. Partiya tarafdorlari buni urushga qarshi qarashdagi rossiyaliklar uchun qonuniy siyosiy maydonga ehtiyoj ortayotgani bilan izohlagan.

 
“Yabloko”ning saylovdan chiqarilishi Moskvada noroziliklarga ham sabab bo‘lgan. Oliy sud binosi oldida partiya tarafdorlari yig‘ilgan, ayrim namoyishchilar politsiya tomonidan ushlangan.

 
Ma’lumot uchun, “Yabloko” 1990-yillar boshida tashkil etilgan. Partiya Rossiya prezidenti Vladimir Putin hokimiyatga kelganidan keyin ham parlamentdan tashqari muxolif siyosiy kuch sifatida faoliyatini davom ettirgan.