Somalida bolalar orasida ochlik inqirozi kuchaymoqda – UNICEF
2026-yilning dastlabki olti oyida to‘yib ovqatlanmaganlik uchun tibbiyot muassasalariga yotqizilgan bolalar soni 32 foizga oshgan.
Somalida xalqaro yordamning qisqarishi ortidan 205 ta sog‘liqni saqlash va oziq-ovqat muassasasi faoliyatini to‘xtatgan. UNICEF vakili Jeyms Elderning ma’lum qilishicha, mablag‘ yetishmasligi davom etsa, mamlakat bo‘ylab yana 618 ta tibbiyot muassasasi yopilishi mumkin.
UNICEF prognoziga ko‘ra, bu yil Somalida qariyb 1,9 million bola to‘yib ovqatlanmaslikdan aziyat chekishi mumkin. Ularning qariyb 500 ming nafari hayot uchun eng xavfli shakl og‘ir o‘tkir to‘yib ovqatlanish holatiga tushishi kutilmoqda.
Tibbiyot muassasalarining yopilishi bolalar uchun davolanish imkoniyatini ham qisqartirmoqda. UNICEF ma’lumotiga ko‘ra, yordam punktlari yopilgani sabab onalar va bolalar tibbiy yordam olish uchun uzoqroq masofani bosib o‘tishga majbur bo‘lmoqda. Bu esa davolanishning kechikishi va oldini olish mumkin bo‘lgan o‘limlar xavfini oshirmoqda.
Somalidagi oziq-ovqat inqirozini qurg‘oqchilik, qurolli to‘qnashuvlar va aholining ko‘chirilishi ham kuchaytirmoqda. Yanvar-aprel oylarida qurg‘oqchilik sabab qariyb 500 ming kishi uyini tark etgan. Mamlakatda avvaldan ko‘chirilganlar soni esa 3,3 millionga yaqinlashgan. Aholining qariyb uchdan bir qismi og‘ir oziq-ovqat tanqisligiga duch kelmoqda.
Gumanitar yordam qisqarishi oziqlanish dasturlarini ham jiddiy cheklagan. “Chegara bilmas shifokorlar” ma’lumotiga ko‘ra, Somalining ayrim hududlarida og‘ir to‘yib ovqatlanmaslikka qarshi dasturlarni moliyalashtirish bu yil 80 foizdan ko‘proqqa kamaygan. Bunda AQSh yordam mablag‘larini to‘xtatgani va boshqa G‘arb davlatlari tomonidan ajratilayotgan mablag‘larning qisqargani ham rol o‘ynagan.
Qurg‘oqchilik sabab suv ta’minoti ham og‘irlashgan. UNICEF ma’lumotiga ko‘ra, qishloq va chorvachilik hududlarida 200 litr suv solinadigan bochka narxi 2 dollardan 8 dollargacha, ya’ni to‘rt baravarga oshgan. Hozir 1,6 milliondan ortiq odam ichimlik suviga muhtoj.
UNICEFning qayd etishicha, Somalida 1 millionga yaqin besh yoshgacha bo‘lgan bola, o‘smir qiz va ayol oziq-ovqat xizmatlaridan foydalanish imkoniyatidan mahrum bo‘lish xavfi ostida qolmoqda.
