Ukraina Rossiyaga zarbalar uchun Starlink’dan foydalanmoqchi
Zelenskiy Ilon Maskdan Starlink’dan Ukraina hududidan tashqarida foydalanishga ruxsat berishni so‘ragan.
Ukraina Rossiya hududining ichkarisidagi harbiy nishonlarga zarba berish uchun Starlink sun’iy yo‘ldosh aloqa tizimidan foydalanish imkoniyatini kengaytirishni so‘ramoqda. Bu haqda Financial Times nashri manbalariga tayanib xabar berdi.
Nashr ma’lumotlariga ko‘ra, Kiyev Rossiyaning ballistik raketa uchirish qurilmalariga qarshi uzoq masofali dronlardan foydalanishni rejalashtirmoqda. Bunday dronlarda Starlink terminallaridan foydalanish operatorlar bilan uzoq masofada barqarorroq aloqa o‘rnatish imkonini berishi, shuningdek, radioelektron to‘sqinliklarga chidamliligini oshirishi mumkin.
Hozirda Ukraina Starlink tizimidan mamlakat hududida harbiy va fuqarolik maqsadlarida foydalanmoqda. Ukraina Prezidenti Vladimir Zelenskiy esa SpaceX rahbari Ilon Maskdan Starlink’dan Ukraina hududidan tashqarida ham foydalanishga ruxsat berishni so‘ragani aytilmoqda.
FT manbalariga ko‘ra, Kiyev Rossiya hududida 200 kilometrgacha bo‘lgan masofadagi uzoq masofali dronlar uchun Starlink’dan foydalanishga ruxsat so‘ragan. Ukraina tomoni zarbalar masofasini cheklash Maskning ushbu talabni ma’qullashiga yordam berishi mumkinligini bildirmoqda.
Nashrning qayd etishicha, masala yuzasidan muzokaralar Ukraina sobiq mudofaa vaziri, Ilon Mask bilan bevosita aloqada bo‘lgan Mixaylo Fedorovning lavozimidan ketishi ortidan murakkablashgan.
