Shaxmat bo‘yicha “O‘zbekgidroenergo” AJ ochiq chempionati g‘oliblari aniqlandi

Davlat mustaqilligining 35 yilligi arafasida vazirlik va idoralar hamda aksiyadorlik jamiyatlarining markaziy apparatlari xodimlari o‘rtasida shaxmat bo‘yicha an’anaviy “Chess Board Open Championship of “Uzbekhydroenergo” JSC” ochiq chempionati o‘tkazildi.

 

 

Musobaqa “O‘zbekgidroenergo” AJ tashabbusi bilan xodimlar o‘rtasida shaxmatni ommalashtirish, ularni sport musobaqalariga keng jalb etish hamda sog‘lom raqobat muhitini shakllantirish maqsadida tashkil etildi. Chempionat “Yagona Vatan, yagona xalq bo‘lib, yangi hayot va kelajak yaratamiz!” shiori ostida o‘tkazildi.

 

 

22-avgust kuni Yoshlar ijod saroyida chempionatning asosiy final bosqichi bo‘lib o‘tdi. Unda O‘zbekiston Shaxmat federatsiyasining malakali hakamlari faoliyat olib bordi. Bellashuvlar FIDE qoidalari asosida shveytsar tizimida tashkil etilib, ishtirokchilar 11 tur davomida g‘oliblik uchun bahslashdi.

 

 

Final bosqichida 120 nafardan ortiq ishtirokchi shaxmat taxtasi atrofida o‘zaro kuch sinashdi.

 

 

Musobaqa yakunlariga ko‘ra, “O‘zavtosanoat” AJ vakili Farrux Rajabov birinchi o‘rinni egalladi. “Asakabank” AJ xodimi Davron Sulaymonov ikkinchi, Ichki ishlar vazirligi vakili Sherbek Xurramov esa uchinchi o‘rinni qo‘lga kiritdi.

 

G‘olib va sovrindorlarga tantanali taqdirlash marosimida pul mukofotlari topshirildi. Jumladan, birinchi o‘rin sohibi Farrux Rajabov 130 million so‘m, ikkinchi o‘rin sohibi Davron Sulaymonov 100 million so‘m, uchinchi o‘rin sohibi Sherbek Xurramov esa 70 million so‘m miqdoridagi pul mukofoti bilan taqdirlandi.

 

 

Shuningdek, musobaqaning turli nominatsiyalarida munosib ishtirok etgan bir qator shaxmatchilarga “O‘zbekgidroenergo” AJning qimmatbaho va esdalik sovg‘alari topshirildi.