Alkogol va tamaki sohasiga oid 8 ta hujjatga 28 ta o‘zgartirish kiritish taklif etildi

O‘zbekistonda alkogol va tamaki bozorini tartibga soluvchi qonunchilikni takomillashtirish bo‘yicha yangi takliflar ishlab chiqildi. 

 

Alkogol va tamaki bozorini tartibga solish inspeksiyasi tashabbusi bilan 8 ta normativ-huquqiy hujjatga 28 ta o‘zgartirish va qo‘shimcha kiritish bo‘yicha loyihalar tayyorlanib, Vazirlar Mahkamasiga kiritilgan.

 

Shuningdek, sohadagi ishlab chiqarish jarayonlarini xalqaro talablar asosida tashkil etish uchun 5 ta yangi standart ishlab chiqilgan. Yashirin iqtisodiyot ko‘lamini aniqlash va ilmiy yondashuvlarni kengaytirish maqsadida Toshkent davlat iqtisodiyot universiteti hamda Toshkent kimyo-texnologiya instituti bilan hamkorlik memorandumlari imzolangan.

 

Joriy yilning dastlabki olti oyida litsenziyalash bo‘yicha 71 ta ariza ko‘rib chiqilgan. Natijada 2 ta alkogol ishlab chiqaruvchi va 15 ta ulgurji korxonaga litsenziya, 8 ta omborxonaga ruxsatnoma berilgan. Litsenziya to‘lovlari bo‘yicha monitoring natijasida 6,1 mlrd so‘m mablag‘ undirilishi ta’minlangan.

 

Shu davrda 318 ta texnologik yo‘riqnoma o‘rganilib, 241 tasi kelishilgan, 77 tasi esa aniqlangan kamchiliklar sabab rad etilgan. Ishlab chiqarish liniyalaridagi 275 ta elektron hisoblagich muhrlangan.

 

Birja savdolari orqali etil spirti xarid qilish bo‘yicha kelib tushgan 37 ta talabnomaning 30 tasiga ruxsat berilgan.

 

Hozirda mamlakatda alkogol va tamaki sohasida 12 856 ta subyekt faoliyat yuritmoqda. Ularning 12 288 tasi chakana, 496 tasi ulgurji savdo korxonasi, qolganlari esa ishlab chiqarish bilan shug‘ullanadi.