Eron kelgusi 50 yillik tahdidlarga tayyorgarlik ko‘rmoqda
Mudofaa vazirligi mamlakatga kelgusida yuzaga kelishi mumkin bo‘lgan xavfsizlik tahdidlarini o‘rganib, mudofaa siyosatining uzoq muddatli yo‘nalishlarini belgiladi.
Eron mudofaa vaziri vazifasini bajaruvchi, brigada generali Majid Ibn ar-Rizo mamlakat kelgusi 50 yil davomida yuzaga kelishi mumkin bo‘lgan tahdidlarga tayyorgarlik ko‘rayotganini bildirgan. U bu haqda 23-avgust kuni qilgan chiqishida ma’lum qilgan deb xabar berdi Tasnim news.
Ibn ar-Rizo so‘nggi qarama-qarshiliklar davomida Eron dushman tomon haqida katta hajmdagi razvedka ma’lumotlari va texnologik tajribaga ega bo‘lganini aytgan. Uning ta’kidlashicha, olingan ma’lumotlar dushmanning taktikasi va operatsiyalarini yaxshiroq tushunish, shuningdek, Eronning mudofaa sohasidagi ustuvor yo‘nalishlarini qayta ko‘rib chiqish imkonini bergan.
Ar-Rizoning qayd etishicha, dushmanning maqsadlari aniqlangan va tahlil qilingan, zarur razvedka ma’lumotlari esa operativ kuchlarga yetkazilgan.
U Eron Qurolli kuchlari nishonlarni aniq hisoblash va samarali boshqarish orqali raqibga jiddiy zarbalar berishga muvaffaq bo‘lganini bildirgan. Shuningdek, Eronning yaqinda AQSH va Isroil bilan yuz bergan urushda assimetrik va samarali strategiyalardan foydalanganini, raqib esa jang maydonida ancha yuqori xarajatlarga duch kelganini ta’kidlagan.
