Eron “Makka kelishuvi”ga qo‘shilish taklifini oldi
Tehron mintaqada umumiy “xavfsizlik soyaboni” yaratilishini ijobiy baholamoqda.
Eron Saudiya Arabistoni, Turkiya va Pokiston o‘rtasida imzolangan kollektiv mudofaa bo‘yicha “Makka kelishuvi”ga qo‘shilish taklifini oldi. Bu haqda Eron Parlament axborot agentligi rahbari Mehdi Rahimiy Al-Mayadeen telekanaliga bergan intervyusida ma’lum qildi.
Rahimiyning so‘zlariga ko‘ra, Eron rasmiylari hozirda mazkur taklifni ko‘rib chiqmoqda. Uning ta’kidlashicha, mintaqa davlatlari o‘rtasida yagona “xavfsizlik soyaboni”ni shakllantirish Eron uchun ijobiy qadam bo‘lishi mumkin. U Tehron bunday mintaqaviy xavfsizlik tizimini uzoq vaqtdan beri qo‘llab-quvvatlab kelayotganini qayd etgan.
Eron rasmiysi AQSh va Eron o‘rtasidagi so‘nggi mojaro AQShning mintaqa davlatlari xavfsizligini ta’minlash borasidagi va’dalari samaradorligi yuzasidan savollarni kuchaytirganini bildirgan. Shuningdek, u mojaroda AQShga yordam bergan davlatlar buning uchun oqibatlarga duch kelishini ta’kidlagan.
“Makka kelishuvi” 7-avgust kuni Saudiya Arabistoni valiahd shahzodasi Muhammad bin Salmon, Turkiya Prezidenti Rajab Toyyib Erdog‘an va Pokiston Bosh vaziri Shahboz Sharif tomonidan imzolangan. Kelishuvga ko‘ra, tomonlardan biriga qilingan qurolli hujum barcha a’zolarga qarshi tajovuz sifatida baholanadi.
Kelishuv AQSh Prezidenti Donald Tramp tomonidan ham qo‘llab-quvvatlangan.
