Maktabgacha va maktab ta’limida o‘zbek tilini o‘qitish metodikasi takomillashtiriladi
180 nafar pedagog o‘zbek tilini zamonaviy metodika asosida o‘qitish bo‘yicha seminarda ishtirok etmoqda.
Maktabgacha va maktab ta’limi vazirligi hamda Ta’limni rivojlantirish respublika ilmiy-metodik markazi hamkorligida o‘zbek tilini zamonaviy metodika asosida o‘qitishga bag‘ishlangan respublika o‘quv-seminari o‘tkazilmoqda.
24–28-avgust kunlari tashkil etilayotgan “Maktabgacha va maktab ta’limida o‘zbek tilini sifatli o‘qitish: zamonaviy metodika va innovatsion yondashuvlar” mavzusidagi seminarda respublikaning barcha hududlaridan 180 nafar pedagog ishtirok etmoqda.
Ularning 120 nafari maktabgacha ta’lim tashkilotlari tarbiyachilari, 60 nafari esa rus va qardosh tillarda ta’lim beriladigan maktablarning boshlang‘ich sinf o‘qituvchilaridan iborat.
Tadbir Maktabgacha ta’lim tashkilotlari direktor va mutaxassislarini qayta tayyorlash va ularning malakasini oshirish institutida o‘tkazilmoqda.
Seminar doirasida maktabgacha ta’lim tashkilotlari tarbiyalanuvchilarining og‘zaki nutqini rivojlantirishga qaratilgan “O‘zbek tili” interfaol ta’lim platformasi ham taqdim etildi.
Seminarda muvaffaqiyatli ishtirok etgan pedagoglarga “Milliy mentor” sertifikati beriladi. Ular seminarda olgan bilim va tajribalarini o‘z hamkasblariga yetkazadi.
