Omskda qurilishdagi yong‘inda O‘zbekiston fuqarosi halok bo‘ldi
Hodisa oqibatida jami to‘rt kishi, jumladan, O‘zbekiston, Qozog‘iston va Tojikiston fuqarolari halok bo‘lgan.
Rossiyaning Omsk shahrida qurilayotgan binoda yuz bergan yong‘in oqibatida shifoxonada vafot etgan to‘rtinchi shaxs, dastlabki ma’lumotlarga ko‘ra, 2003-yilda tug‘ilgan O‘zbekiston fuqarosi bo‘lgan. Bu haqda viloyat prokuraturasi ma’lumotiga tayanib, TASS xabar berdi.
Ma’lum qilinishicha, fuqaro yong‘in oqibatida jabrlangan va keyinchalik Nijniy Novgoroddagi tibbiyot muassasasiga maxsus reys orqali olib ketilgan. Biroq u shifoxonada vafot etgan.
Yong‘in 15-avgust kuni ertalab Omsk shahridagi Krupskaya va Arxitektorov ko‘chalari kesishmasida qurilayotgan binoda yuz bergan. Dastlabki ma’lumotlarga ko‘ra, yong‘in binoning birinchi qavatidan boshlanib, yuqori qavatlarga tarqalgan.
Hodisa oqibatida jami 11 kishi jarohatlangan, ulardan uch nafari qutqarilgan. To‘rt kishi, jumladan, O‘zbekiston, Qozog‘iston va Tojikiston fuqarolari halok bo‘lgan.
Mazkur holat yuzasidan Rossiya Jinoyat kodeksining 143-moddasi 2-qismi — mehnat xavfsizligi talablarini buzish bo‘yicha jinoyat ishi qo‘zg‘atilgan. Hozirda tergovga qadar tekshiruv va tergov harakatlari davom ettirilmoqda.
