Rossiyada ikki Tojikiston fuqarosi ayollar kiyimida yurgani uchun deportatsiya qilinadi
Shuningdek, ularga nisbatan 10 sutkalik ma’muriy qamoq jazosi tayinlangan.
Rossiyaning Moskva shahrida ikki Tojikiston fuqarosi ayollar kiyimida jamoat joyida yurgani ortidan ma’muriy javobgarlikka tortildi. Lyublin sudi ularni 10 sutkaga ma’muriy qamoqqa olish va Rossiya hududidan chiqarib yuborish haqida qaror qabul qilgan. Bu haqda mahalliy nashrlar sud materiallariga tayanib xabar berdi.
Sud materiallariga ko‘ra, H. Rahimov va Y. Saizoda 18-avgust kuni Moskvaning “Sadovod” bozorida qo‘lga olingan. Politsiya ma’lumotida ular ayollar kiyimida bo‘lgani va kiyimlarda “tanlov erkinligi” mazmunidagi shior aks etgani qayd etilgan.
Huquqni muhofaza qiluvchi organlar ularning harakatlarini Rossiyada taqiqlangan “noan’anaviy jinsiy munosabatlarni targ‘ib qilish” sifatida baholagan. Biroq sud materiallarida kiyimlarning aniq tavsifi va shiorning qanday ko‘rinishda bo‘lgani batafsil ko‘rsatilmagan.
Sudda Rahimovning turmush qurgani va bir nafar farzandi borligi, Saizodaning esa to‘rt nafar voyaga yetmagan farzandi borligi ma’lum bo‘lgan.
Sud qaroriga ko‘ra, fuqarolar Saxarovo chet el fuqarolari uchun mo‘ljallangan maxsus hibsxonaga joylashtiriladi. Shuningdek, ularni 17-noyabrgacha Rossiyadan deportatsiya qilish hamda sud qarori chiqarilgan kundan boshlab besh yil muddatga Rossiyaga kirishini taqiqlash belgilangan.
