Shavkat Mirziyoyev va Ilhom Aliyev Buxoroning tarixiy obidalarini ziyorat qildi
Tashrif davomida Ozarbayjon delegatsiyasiga Buxoroning Buyuk Ipak yo‘lidagi muhim savdo, ilm-fan va ta’lim markazi sifatidagi ko‘p asrlik tarixi haqida so‘zlab berildi.
O‘zbekiston Prezidenti Shavkat Mirziyoyev va Ozarbayjon Prezidenti Ilhom Aliyev rafiqalari hamrohligida Buxoroning jahonga mashhur tarixiy obidalari bilan tanishdi.
Oliy martabali mehmonlar Somoniylar maqbarasi, Ark qo‘rg‘oni, Poyi Kalon va Labi Hovuz majmualari hamda Ko‘kaldosh madrasasini ziyorat qildi.
Tashrif Ismoil Somoniy tomonidan barpo etilgan Somoniylar maqbarasidan boshlandi. Mehmonlarga obidaning tarixi, me’moriy xususiyatlari va Sharqda ilm-fan hamda madaniyat rivojidagi ahamiyati haqida ma’lumot berildi. Mazkur maqbara 1993-yilda YUNЕSKOning Umumjahon merosi ro‘yxatiga kiritilgan.
Shundan so‘ng davlat rahbarlari qadimiy Ark qal’asiga tashrif buyurdi. Ko‘p asrlar davomida Buxoroning siyosiy va ma’muriy markazi bo‘lgan qal’a keyinchalik Buxoro hukmdorlarining qarorgohi vazifasini bajargan. Bugungi kunda Ark Buxoroning eng mashhur tarixiy obidalaridan biri hisoblanadi.
Mehmonlar Poyi Kalon majmuasi bilan ham tanishdi. Markaziy Osiyoning eng salobatli me’moriy majmualaridan biri bo‘lgan ushbu ansambl tarkibidan 1127-yilda bunyod etilgan Kalon minorasi, XVI asr boshlariga oid Kalon masjidi va Mir Arab madrasasi o‘rin olgan.
Shuningdek, Shavkat Mirziyoyev va Ilhom Aliyev Labi Hovuz majmuasini ziyorat qildi. Qadimiy hovuz atrofida shakllangan ushbu tarixiy maskanda Ko‘kaldosh madrasasi, Nodir Devonbegi madrasasi va xonaqohi joylashgan.
Tashrif davomida Ozarbayjon delegatsiyasiga Buxoroning Buyuk Ipak yo‘lidagi muhim savdo, ilm-fan va ta’lim markazi sifatidagi ko‘p asrlik tarixi haqida so‘zlab berildi.
Shuningdek, mehmonlarga xalq hunarmandchiligi namunalari va tarixiy obidalardagi badiiy bezaklar namoyish etildi. Oliy martabali mehmonlar Buxoroning o‘ziga xos me’moriy merosi, tarixiy obidalari va madaniy an’analari bilan yaqindan tanishdi.
