"Erkaklarning bir-birini quchoqlab, o‘pishi to‘g‘ri ish emas" — Toqayev
Qozog‘iston Prezidenti erkaklar, xususan, harbiylar o‘rtasida quchoqlashish odatini tanqid qildi.
Qozog‘iston Prezidenti Qosim-Jomart Toqayev erkaklar, xususan, harbiylar o‘rtasida quchoqlashish odatini tanqid qilib, bunday holat qozoq xalqining an’anaviy odob-axloq me’yorlariga mos kelmasligini ta’kidladi. U bu haqda Ostonada boʻlib oʻtgan parlament saylovlarida ovoz berganidan keyin jurnalistlarga ma'lum qilgan.
Davlat rahbari suhbatda erkaklarning, hatto harbiy forma kiygan generallarning ham bir-birini quchoqlayotganiga munosabat bildirgan. Uning ta’kidlashicha, bunday holat qozoq xalqining tarixiy urf-odatlariga xos emas.
Toqayev bunday vaziyatni Ikkinchi jahon urushida qatnashgan sovet marshallari misolida tasavvur qilish qiyinligini aytib, an’anaviy muomala madaniyatiga qaytish zarurligini ta’kidlagan.
Prezident erkaklar o‘rtasidagi salomlashuv va samimiy munosabatlarda qo‘l berib ko‘rishish, zarur holatlarda esa o‘ng qo‘lni yurak ustiga qo‘yish kabi odatlarni ma’qul deb hisoblashini bildirgan.
Shuningdek, Toqayev jamiyatdagi an’anaviy muomala va odob-axloq me’yorlarini mustahkamlashga qaratilgan xulq-atvor kodeksini ishlab chiqish tashabbusini ilgari surgan. U yoshlar va katta avlod vakillarini milliy an’analarga hurmat bilan munosabatda bo‘lishga chaqirgan.
