AQSh 200 minggacha vizalarni bekor qilishi mumkin
Viza bekor qilinishi uning egasi darhol AQShdan deportatsiya qilinishini anglatmaydi.
AQSh prezidenti Donald Tramp ma’muriyati mamlakatda boshpana so‘ragan yoki boshpana olish jarayonida bo‘lgan xorijliklarga berilgan 200 minggacha B1/B2 turistik va biznes vizalarini bekor qilishni rejalashtirmoqda. Bu haqda Associated Press AQSh Davlat departamenti hujjatlariga tayanib xabar berdi.
Davlat departamenti Ichki xavfsizlik departamenti bilan hamkorlikda AQShga qisqa muddatli tashrif buyuruvchi sifatida kirib, keyinchalik mamlakatda doimiy qolish maqsadida boshpana so‘ragan xorijliklarning noimmigratsion vizalarini aniqlash va bekor qilish ustida ishlamoqda.
AP ma’lumotlariga ko‘ra, tegishli choralar kelgusi haftalarda e’lon qilinishi kutilmoqda. Ular asosan 2016–2026-yillar oralig‘ida berilgan B1/B2 vizalariga taalluqli bo‘lishi mumkin.
AQSh Davlat departamenti vakili Tommi Pigott vizalar bekor qilinishi mumkin bo‘lgan aniq sonni ma’lum qilmagan. Uning qayd etishicha, jarayon davom etar ekan, bekor qilinadigan vizalar soni o‘zgarib boradi.
Viza bekor qilinishi uning egasi darhol AQShdan deportatsiya qilinishini anglatmaydi. Biroq bunday shaxsning mamlakatga turizm yoki biznes maqsadida kirish huquqi bekor qilinadi va uning immigratsion maqomi boshqa tartibda ko‘rib chiqilishi mumkin.
Mazkur reja amalga oshirilsa, AQSh tarixidagi eng yirik ommaviy viza bekor qilish holatlaridan biri bo‘lishi va sud jarayonlariga sabab bo‘lishi mumkin.
Eslatib o‘tamiz, avvalroq AQSh federal sudi Tramp ma’muriyatining 75 davlat fuqarolariga immigratsion vizalar berilishini vaqtincha to‘xtatish haqidagi siyosatini noqonuniy deb topib, ushbu qarorni bekor qilgan edi.
