Islom sivilizatsiyasi markazi jahon mediasiga buyuk merosning yangi tayanch nuqtasi sifatida taqdim etildi
Qariyb 50 davlatdan 300 nafarga yaqin media va ekspertlar ishtirokidagi forumda Islom sivilizatsiyasi markazining xalqaro media salohiyati hamda buyuk merosni zamonaviy multimedia formatlarida yoritish masalalari ko‘rib chiqildi.
25 avgust kuni Toshkent shahridagi Islom sivilizatsiyasi markazida “Islom sivilizatsiyasi: yangi nigoh — yangi kashfiyotlar” xalqaro mediaforumining ilk yalpi sessiyasi bo‘lib o‘tmoqda.
“O‘zbekistondagi Islom sivilizatsiyasi markazi — buyuk merosning yangi tayanch nuqtasi” mavzusidagi sessiyada CNN, BBC Studios, 1001 Inventions xalqaro loyihasi, shuningdek, O‘zbekistonning davlat va media tashkilotlari vakillari ishtirok etdi.
Sessiya Islom sivilizatsiyasi markazi direktori Firdavs Abduxoliqovning markazni yangi turdagi madaniy-ma’rifiy media platforma sifatidagi salohiyatiga bag‘ishlangan ma’ruzasi bilan boshlandi. Ishtirokchilarga markaz faoliyati va uning imkoniyatlariga bag‘ishlangan taqdimot ham namoyish etildi.
Tadbirda xalqaro media kompaniyalari vakillari ham ishtirok etdi. Jumladan, CNN vakili Paula Hancocks sessiyaga moderatorlik qildi. CNN International Commercial ijrochi vitse-prezidenti Fil Nelsonning maxsus video tabrigi namoyish etildi. Kompaniyaning mintaqaviy vakili Imran Ahmad esa “CNN O‘zbekistonni kashf etmoqda: islom sivilizatsiyasi merosi asosiy yo‘nalishga aylanganida” mavzusida ma’ruza qildi.
O‘zbekiston Respublikasi Prezidenti Administratsiyasi huzuridagi Ommaviy axborot vositalari uchun kontent tayyorlash markazi direktori o‘rinbosari Jahongir Abdurahmonov «Madaniy merosning yangi tili: tarix, ilm-fan va turizmning mulьtimedia formatlari» mavzusida chiqish qildi.
Shuningdek, 1001 Inventions loyihasi asoschisi Ahmad Salim va rejissyor Shohrux Rasulov “Dunyoni o‘zgartirganlar: islom sivilizatsiyasining buyuk shaxslari katta ekranda” loyihasini taqdim etdi. Tadbir davomida “Ma’rifat aks-sadosi” loyihasi ham namoyish qilinib, “Oskar” mukofoti sovrindori Ben Kingsli ishtirokidagi filmdan maxsus parcha ko‘rsatildi.
BBC Studiosning Yevroosiyodagi tijoriy vakolatxonasi rahbari Sergey Stanovkin esa islom sivilizatsiyasi merosini global media makonida targ‘ib qilish masalasida ma’ruza qildi.
Sessiya yakunida “Meros sadolari: islom sivilizatsiyasi jahon media makonida qanday yangramoqda?” mavzusida ochiq xalqaro munozara o‘tkazildi. Unda Mali, Ozarbayjon, Misr, Niger, Turkiya, Yaman, Tunis va O‘zbekiston ommaviy axborot vositalari hamda professional uyushmalari vakillari qatnashdi.
Forumda AMAP, Saba, TAP, Anadolu Ajansı, Yeni Müsavat/Musavat media guruhi hamda Afro-Osiyo media ittifoqi vakillari ham ishtirok etdi.
Xalqaro media-forumning asosiy maydoni O‘zbekistondagi Islom sivilizatsiyasi markazi bo‘lib, tadbirda qariyb 50 davlatdan 300 nafarga yaqin media va ekspertlar hamjamiyati vakillari — media kompaniyalari, axborot agentliklari va telekanallar rahbarlari, jurnalistlar, produserlar, olimlar hamda kreativ industriyalar mutaxassislari jam bo‘lgan.
