Qozog‘istonda elektr skuterlarni piyodalar yo‘laklarida haydash taqiqlandi
Cheklovlar yo‘l-transport hodisalari sonining ortib borayotgani sabab joriy etilgan.
Qozog‘istonda 25-avgustdan boshlab elektr skuterlarni piyodalar yo‘laklari va yo‘lakchalarida boshqarish taqiqlandi. Tegishli o‘zgarishlar yo‘l-transport hodisalari sonining ortib borayotgani sabab joriy etildi. Bu haqda Bosh prokuratura ma'lum qildi.
Yangi tartibga ko‘ra, velosiped yo‘li yoki yo‘lagi mavjud bo‘lsa, elektr skuterlar faqat shu hududlarda boshqarilishi mumkin. Bunday yo‘laklar bo‘lmagan taqdirda esa harakat yo‘lning o‘ng cheti yoki yo‘l yoqasidan, yo‘l harakati qoidalariga muvofiq amalga oshirilishi kerak.
Qozog‘iston Bosh prokuraturasi ma’lumotlariga ko‘ra, yil boshidan buyon moped haydovchilari ishtirokida 390 ta YTH sodir bo‘lgan. Ularda 33 kishi halok bo‘lib, 461 kishi jarohatlangan.
Shuningdek, velosipedchilar ishtirokida 169 ta, kichik elektr transport vositalari bilan bog‘liq 97 ta va elektr skuter haydovchilari ishtirokida 47 ta YTH qayd etilgan. Mazkur hodisalarda jami 10 nafar bola halok bo‘lgan, 329 nafar voyaga yetmagan jarohatlangan.
Nazorat organlari elektr skuter, moped va boshqa kichik elektr transport vositalari foydalanuvchilarining o‘zlari ham ko‘pincha YTH qurboniga aylanayotganini qayd etgan. Xususan, elektr skuterlar bilan bog‘liq 145 ta, mopedlar bilan 82 ta va kichik elektr transport vositalari bilan 52 ta to‘qnashuv sodir bo‘lgan. Ularda to‘rt kishi halok bo‘lib, qariyb 300 kishi jarohatlangan.
