Qozog‘istondagi yirik neftni qayta ishlash zavodida yong‘in chiqdi
Yong‘inni o‘chirishga 65 ga yaqin xodim va 19 ta texnika jalb qilingan.
Qozog‘istonning Atrau neftni qayta ishlash zavodida yong‘in sodir bo‘ldi. Korxona mamlakatdagi uchta yirik neftni qayta ishlash zavodidan biri bo‘lib, yiliga 5,5 million tonnagacha neftni qayta ishlash quvvatiga ega.
Korxona matbuot xizmatiga ko‘ra, 25 avgust kuni mexanik tozalash inshootlarining yopiq turdagi tindirgichida neft shlami yonib ketgan. Hodisa vaqtida ushbu obyektida ish olib borilmagan. Yong‘in oqibatida hech kim jabrlanmagan, zavod esa odatdagi rejimda faoliyatini davom ettirgan.
Qozog‘iston Favqulodda vaziyatlar vazirligi ma’lumotiga ko‘ra, yong‘in haqidagi xabar 12:55 da kelib tushgan. 13:42 da yong‘in lokalizatsiya qilingan va uning tarqalishi to‘xtatilgan. Keyinchalik yong‘in to‘liq bartaraf etilgan. Uni o‘chirishga 65 ga yaqin xodim va 19 ta texnika jalb qilingan.
Atrau neftni qayta ishlash zavodi Atyrau viloyatida joylashgan bo‘lib, 1945-yilda foydalanishga topshirilgan. Korxonaning asosiy egasi Qozog‘istonning “KazMunayGaz” milliy neft-gaz kompaniyasi hisoblanadi.
Qayd etilishicha, Qozog‘istondagi mazkur hodisa Rossiyada yoqilg‘i taqchilligi kuchayib borayotgan va Qozog‘iston Rossiya neftini qayta ishlash bo‘yicha kelishuvlarga kirishayotgan bir paytda yuz berdi.
