Singapur oilalarga har bir farzand uchun 55 ming dollardan ortiq yordam beradi

 

Singapur hukumati mamlakatda tug‘ilish darajasining pasayishini jilovlash maqsadida oilalarni qo‘llab-quvvatlash choralarini kengaytirmoqda. Yangi tashabbus doirasida ota-onalarga har bir farzand uchun 17 yoshgacha bo‘lgan davrda qariyb 70 ming Singapur dollari — 55 ming AQSh dollaridan ortiq miqdorda moliyaviy yordam ko‘rsatiladi. Bu haqda Financial Times xabar berdi.

 

Singapur Bosh vaziri Lourens Vong 23-avgust kuni qilgan yillik murojaatida bolalar nafaqasi va ota-onalik ta’tili tizimlari qayta ko‘rib chiqilishini ma’lum qildi. Hukumat farzand ko‘rish va ularni tarbiyalashni istagan oilalarga uzoq muddatli yordam ko‘rsatishni maqsad qilgan.

 

2025-yilda Singapurda tug‘ilishning umumiy koeffitsiyenti rekord darajada pasayib, har bir ayolga 0,87 nafar bolani tashkil etdi. 2024-yilda bu ko‘rsatkich 0,97 edi. Demograflarga ko‘ra, immigratsiya hisobga olinmagan holda aholi sonining barqaror saqlanishi uchun tug‘ilish darajasi taxminan 2,1 bo‘lishi kerak.

 

Hukumat tomonidan ajratiladigan yordam tarkibiga:

• har bir bola uchun 17 yoshgacha qariyb 70 ming Singapur dollari miqdoridagi to‘g‘ridan-to‘g‘ri moliyaviy ko‘mak;

• 10 ming Singapur dollari miqdoridagi tug‘ilish uchun to‘lov;

• bolaning keyingi ta’limi uchun 10 ming Singapur dollari miqdoridagi mablag‘;

• bolalarni parvarishlash bo‘yicha nafaqalarni kengaytirish;

• ko‘p farzandli oilalarni qo‘shimcha qo‘llab-quvvatlash;

• farzandli oilalarga birinchi uyini sotib olishda qo‘shimcha imkoniyatlar yaratish kiradi.

 

Shuningdek, hukumat ota-onalik ta’tili tizimini ham qayta ko‘rib chiqadi. Bolalarni parvarishlash bilan bog‘liq xarajatlarning katta qismini davlat qoplashiga e’tibor qaratiladi.

 

Lourens Vong hukumat oilalarga farzand ko‘rish qarorida uzoq muddat davomida yordam berishini ta’kidladi. Biroq u ko‘rilayotgan choralar tug‘ilish darajasini qisqa muddatda o‘rnini bosish darajasiga olib chiqmasligi mumkinligini ham qayd etdi.

 

Shu sababli Singapur aholining kamayib ketishining oldini olish uchun tug‘ilish darajasini oshirish bilan bir qatorda, immigratsiya siyosatini ham davom ettiradi. Bosh vazirning ta’kidlashicha, mamlakatga yangi keluvchilar “o‘lchovli va barqaror sur’atlarda” qabul qilinadi.