Surxondaryoda 4 ayol bir ayolni samosud qildi
Janjalga yer masalasi sabab bo‘lgan.
Surxondaryo viloyati Jarqo‘rg‘on tumanida yer masalasi sabab fuqarolar o‘rtasida yuzaga kelgan mojaro yuzasidan tuman hokimligi rasmiy munosabat bildirdi.
Jarqo‘rg‘on tumani hokimligi axborot xizmatining ma’lum qilishicha, holat Mehnatobod mahallasida yashovchi fuqarolar M. N. va S. N. o‘rtasida 2026-yil 13-mart kuni yer masalasi yuzasidan kelib chiqqan nizoga borib taqaladi.
Nizo davomida tomonlar o‘rtasida janjal yuzaga kelgan. Unda S. N. ning qarindoshlari Z. T., K. N. va E. N. ham ishtirok etgan. Holat yuzasidan o‘zaro haqorat va tan jarohati yetkazilgani bilan bog‘liq holatlar qayd etilgan.
Mazkur holat bo‘yicha tergovga qadar tekshiruv o‘tkazilib, to‘plangan hujjatlar qonunchilikda belgilangan tartibda sudga yuborilgan.
Shuningdek, M. N. ning yashash xonadoni qurilishi bilan bog‘liq holat yuzasidan 2025-yil 27-oktabr kuni Ma’muriy javobgarlik to‘g‘risidagi kodeksning 60-moddasi 3-qismi asosida bayonnoma rasmiylashtirilgan. 31-oktabr kuni esa BHMning 200 baravari miqdorida jarima qo‘llash to‘g‘risida qaror qabul qilingan. Qaror ijrosi bo‘yicha hujjatlar Majburiy ijro byurosiga yuborilgan.
Ayni paytda nizoga oid sud jarayoni davom etmoqda. Shu bois sudning yakuniy qarori qabul qilinmaguncha, ijtimoiy tarmoqlarda tarqalgan video va boshqa materiallar asosida bir tomonlama xulosa chiqarish maqsadga muvofiq emasligi ta’kidlangan.
Sud qarori qonuniy kuchga kirgach, zaruratga ko‘ra holat yuzasidan qo‘shimcha rasmiy ma’lumot berilishi ma’lum qilingan.
