“Ushbu tashrif yana bir muhim sahifani ochdi”: Saida Mirziyoyeva Ilhom Aliyevning O‘zbekistonga tashrifi haqida
Saida Mirziyoyeva Ozarbayjon Prezidentining O‘zbekistonga tashrifi haqida fikr bildirib, ikki davlat o‘rtasidagi birodarlik munosabatlari va imzolangan Abadiy do‘stlik to‘g‘risidagi shartnomaning ahamiyatini qayd etdi.
O‘zbekiston Prezidenti Administratsiyasi rahbari Saida Mirziyoyeva Ozarbayjon Prezidenti Ilhom Aliyev boshchiligidagi delegatsiyaning O‘zbekistonga tashrifiga munosabat bildirdi.
Saida Mirziyoyeva Telegram’dagi sahifasida Ozarbayjon Prezidenti va uning oila a’zolarini O‘zbekistonda katta ehtirom bilan kutib olinganini ta’kidladi.
U O‘zbekiston va Ozarbayjon o‘rtasidagi munosabatlarni birodarlik rishtalari bog‘lab turishini qayd etdi. Uning so‘zlariga ko‘ra, ikki xalq o‘rtasidagi yaqinlik nafaqat rasmiy aloqalarda, balki xalqlarning bir-biriga bo‘lgan mehr-oqibatida ham namoyon bo‘ladi.
“Tariximiz, madaniyatimiz va an’analarimizdagi mushtaraklik bugun infratuzilmadan to investitsiyalargacha — ko‘plab sohalardagi yangi qo‘shma loyihalar ko‘rinishida yanada boyimoqda. Ushbu tashrif ko‘p qirrali aloqalarimiz tarixida yana bir muhim sahifani ochdi”, — deya yozdi Saida Mirziyoyeva.
Tashrif doirasida ikki mamlakat o‘rtasida Abadiy do‘stlik to‘g‘risidagi shartnoma imzolangan.
Saida Mirziyoyeva ushbu hujjat nomi O‘zbekiston va Ozarbayjonni bog‘lab turgan munosabatlarning mohiyatini ifodalashini ta’kidladi.
“Ozarbayjonlik do‘stlarimizni O‘zbekistonda ko‘rishdan har doim xursandmiz. Hamisha bag‘rini ochib sizni qarshi oladigan diyorimizga xush kelibsiz, aziz qardoshlar!”, — deya yozdi u.
