558 nafar fidoyi inson yuksak davlat mukofotlari bilan taqdirlandi
Shavkat Mirziyoyev barcha yutuqlar xalqning fidokorona mehnati bilan qo‘lga kiritilayotganini ta’kidladi.
Prezident Shavkat Mirziyoyev O‘zbekiston mustaqilligining 35 yilligi munosabati bilan davlat mukofotlarini topshirish marosimida bugun Yangi O‘zbekistonning ovozi eng nufuzli minbarlarda baland yangrayotgani, mamlakatning xalqchil va tinchlikparvar siyosati xalqaro miqyosda e’tirof etilayotganini qayd etdi.
“Yuqoridagi barcha o‘zgarishlar ko‘p millatli xalqimiz, siz kabi jonkuyar yurtdoshlarimiz mehnati bilan amalga oshmoqda”, — dedi Prezident.
Ta’kidlanganidek, qaysi soha yoki vazifada faoliyat yuritishidan qat’i nazar, har bir inson uchun o‘z mehnatining munosib e’tirof etilishini ko‘rish katta baxtdir.
Mustaqillikning 35 yilligi munosabati bilan islohotlarga daxldorlik tuyg‘usi bilan yashab, sidqidildan mehnat qilayotgan 558 nafar fidoyi inson yuksak davlat mukofotlari bilan taqdirlandi.
Prezident mukofotlangan yurtdoshlarning har biri mamlakat taraqqiyotiga munosib hissa qo‘shayotganini qayd etib, ularning mashaqqatli mehnat yo‘li va erishgan yutuqlarini yaxshi bilishini ta’kidladi.
Mukofotlanganlar orasida butun umrini bunyodkorlikka bag‘ishlagan xorazmlik nuroniy Rustam Sultonov ham bor. Tabarruk yoshda bo‘lishiga qaramay, u viloyat nuroniylariga boshchilik qilib, mahalla va qishloqlarni obod etish, yoshlarni ezgu maqsadlar sari ruhlantirish borasida ibratli faoliyat olib bormoqda.
